Në një video të publikuar në internet, shihet se si një statujë e vogël e Shën Marisë nxjerr gjak nga sytë. Pelegrinët e kanë vërshuar shtëpinë e familjes Frias në qytetin Metan të Argjentinës për ta parë statujën. Ajo ishte bërë kryetemë e medieve edhe më parë gjatë këtij viti, ndërsa pronarja e statujës ka vendosur që ta incizojë fenomenin e çuditshëm.
Në video shihet fytyra e statujës që mbulohet nga një lëng i kuq dhe duket se ai lëng po rrjedh nga sytë e statujës. Pronarja e statujës, Rosana Mendoza, iu ka thënë medieve lokale se statujën e kishte marrë para tetë vitesh, kur e kishte përjetuar një abortim. Ajo ka deklaruar se statuja ka filluar të nxjerrë gjak në prill të vitit 2017.
Rosana thotë se kjo dukuri ka ndodhur 38 herë deri më tash, ndërsa kur një gjë e tillë kishte ndodhur për herë të parë, rreth 7 mijë persona ishin mbledhur para shtëpisë së saj. Ndërkaq, hera e fundit kur statuja nxirrte gjak është kur ajo po lutej për shëndetin e nënës së saj.
“Gjithmonë ju them njerëzve se kjo varet nga besimi dhe jo nga ne. Ne nuk bëjmë asgjë. Vetëm ua hapim dyert që ata të mund të luten, e pastaj Zoti do ta bëjë një mrekulli”, thotë ajo. Pronarja ia ka ndërtuar një vend të veçantë në shtëpi statujës, duke e rrethuar me xhama. Raportohet se rreth 30 njerëz vijnë çdo javë në shtëpinë e saj, që të luten para statujës, shkruan “Daily Mail”, transmeton Gazeta Express.
