Dy aksidente me fatalitet në jug të Turqisë kanë lënë të vdekur 16 persona të dielën, kanë njoftuar autoritetet turke.
Aksidenti më i rëndë ndodhi në Antalia, ku një autobus me 34 pasagjerë, që udhëtonte nga Tekirdağ drejt Antalias, u përmbys në një autostradë të rrëshqitshme nga shiu dhe e mbuluar nga mjegulla.
Nëntë persona humbën jetën, përfshirë shoferin e autobusit, ndërsa 25 u plagosën, shtatë prej tyre në gjendje të rëndë shëndetësore.
Autoritetet dyshojnë se shpejtësia e lartë ka qenë një nga shkaqet e aksidentit.
Ndërkohë, një aksident tjetër në provincën Burdur, në rrugën Antalia–Isparta, shkaktoi shtatë viktima dhe pesë të plagosur.
Hetimet për shkaqet e dy ngjarjeve janë në vazhdim.
