Presidentja e Kosovës, Vjosa Osmani, ka përshkruar 28 Nëntorin e këtij viti si një udhëtim simbolik nëpër zemrën e historisë shqiptare, duke e nisur festën në Shkodër, për ta vijuar në Vlorë e përmbyllur në Tiranë.
Me një mesazh të mbushur me emocione kombëtare, ajo ka theksuar unitetin, krenarinë dhe trashëgiminë e përbashkët që bashkojnë shqiptarët kudo që janë, duke e cilësuar Ditën e Flamurit si kujtesë të rrugës së përbashkët dhe premtim për të ardhmen, përcjell “Bota sot”.
Shkrimi i plotë
Nga Shkodra në Vlorë, për ta përmbyllur në Tiranë, ky 28 Nëntor ishte një udhëtim zemre nëpër historinë tonë të përbashkët.
Shkodra na hapi dyert si vetëm ajo di – me zemër plot, me rrugë që të flasin dhe me një dashuri që të kujton pse ky komb ka mbijetuar në çdo stuhi. Festën e vazhduam në Vlorë, në qytetin ku flamuri nuk valëvitet thjesht nga era, por nga historia, nga gjaku, nga amaneti i lirisë. Aty çdo 28 Nëntor merr kuptimin e tij të vërtetë: krenarinë për atë që kemi qenë dhe forcën për të qenë më shumë.
Dhe mbrëmja na bashkoi në Tiranë, në Pallatin e Brigadave, aty ku drita e ceremonisë i jep jetë kujtesës sonë të përbashkët. Në atë hapësirë ku Shqipëria dhe Kosova nuk qëndrojnë si dy vende, por si një zemër e vetme që rreh përpara, me besim e me dinjitet.
Ky 28 Nëntor ishte kujtesë dhe premtim njëkohësisht: se rruga jonë është e gjatë, por e jona; se historia nuk na ka lënë vetëm plagë, por edhe shumë arsye për të qenë krenarë. Dhe mbi të gjitha, se bashkë, shqiptarë kudo që jemi, mbetemi një komb që di të ngrihet, të festojë dhe të shikojë kah e nesërmja me kokën lart.
