Kryeministri në detyrë i Republikës së Kosovës, Albin Kurti, sot në Bruksel, mori pjesë një diskutim të organizuar nga Qendra për Studime të Politikave Evropiane (CEPS) në bashkëpunim me Ambasadën e Republikës së Kosovës në Bruksel, me temë “Rruga e Kosovës drejt BE-së: avancimi i demokracisë, siguria dhe rritja ekonomike”.
Aty ai mbajti një fjalim hyrës dhe pastaj iu përgjigj pyetjeve dhe interesimit të pjesëmarrësve në këtë ngjarje.
Kurti përgjatë fjalimin të tij dhe diskutimit theksoi se BE-ja duket se ka vendosur themelet për një marrëdhënie më të ngushtë, bashkëpunim më të thellë dhe një rrugë të strukturuar për anëtarësimin e vendeve të Ballkanit Perëndimor.
Kurti: Procesi i zgjerimit mbetet tepër i zgjatur
“Pavarësisht këtyre përparimeve, procesi i zgjerimit mbetet tepër i zgjatur, burokratik dhe i paqartë. Ai ka evoluar në një objektiv lëvizës, duke ngritur dyshime nëse vërtet ekziston vullnet politik për të integruar Ballkanin Perëndimor në familjen evropiane. Një ndjenjë e rritjes së zhgënjimit, veçanërisht mes brezave të rinj, kërcënon legjitimitetin e premtimit të BE-së”, tha ai.
Sipas tij, Kosova nuk ka plan B për anëtarësimin e saj në Bashkimin Evropian, dhe se zgjerimi i Bashkimit Evropian duhet të jetë strategjik, i bazuar në merita dhe real.
Kurti: Kosova nuk ka plan B për anëtarësimin në BE
“Për më shumë se një dekadë, populli i Kosovës ka ëndërruar të bëhet pjesë e BE-së—jo vetëm për premtimin e pasurisë, por për vlerat që mbart BE-ja, interesat e përbashkëta që ndajmë dhe mundësinë tonë për të kontribuar si anëtar i Bashkimit Evropian. Ne kemi reformuar, forcuar dhe alignuar veten me standardet e BE-së. Për më tepër, Kosova nuk ka një Plan B për anëtarësimin në BE. Kosova ka dëshmuar se është një partner i besueshëm i Bashkimit Evropian dhe beson fuqishëm në të ardhmen e saj evropiane. Si një shembull i demokracisë në rajon, ne kemi treguar angazhimin tonë kur është dhënë mundësia e barabartë. Është koha që BE-ja të tregojë se e sheh Kosovën si pjesë të të ardhmes së saj”, ka thënë ai.
Ai ritheksoi se anëtarësimi në Bashkimin Evropian dhe NATO janë qëllime strategjike të vendit tonë.
Kurti: Kosova dhe BE-ja të intensifikojnë përpjekjet për të kapërcyer pengesat drejtë anëtarësimit
“Ka ardhur koha që Kosova dhe BE-ja të intensifikojnë përpjekjet e përbashkëta për të kapërcyer pengesat në procesin e anëtarësimit të Kosovës në BE. Kështu, duhet të nisin kërkesën për Kosovën, duke vlerësuar kapacitetet tona institucionale dhe ligjore për Anëtarësimin në BE; dhe të përgatisin një opinion meritokratik për statusin e kandidatit të BE-së”, tha ai.
Nënvizoi faktin se Kosova mbetet plotësisht e linjëzuar me Politikën e Përbashkët të Bashkimit Evropian për Punë të Jashtme dhe Siguri dhe vlerat e BE-së si pjesë e reformave të vazhdueshme, si dhe ka një kornizë ligjore moderne dhe të avancuar për mbrojtjen e të drejtave të njeriut, përfshirë atyre të pakicave.
Ky diskutim u moderua nga Dr. Tinatin Akhvlediani, hulumtuese në CEPS.
