Një ceremoni e ngritjes së flamurit u mbajt sot në Shtabin e KFOR-it në Prishtinë, për të mirëpritur Belgjikën, Luksemburgun dhe Holandën si vende kontribuuese me trupa në misionin e NATO-s në Kosovë.
Që nga fillimi i vitit 2024, pesë aleatë të tjerë evropianë kanë filluar të kontribuojnë në mision, në mbështetje të përpjekjeve të NATO-s në Kosovë, duke përfshirë Francën dhe Portugalinë, përkatësisht në janar dhe shtator 2024.
Gjeneralmajor Enrico Barduani, komandant i KFOR-it, shprehu vlerësimin e tij për ardhjen e personelit të ri.
Ai tha se rritja e mëtejshme e KFOR-it dëshmon përkushtimin tonë kolektiv dhe të palëkundur për sigurinë e qëndrueshme në Kosovë dhe stabilitetin rajonal, duke përfshirë mbështetjen për dialogun e lehtësuar nga BE-ja për normalizimin e marrëdhënieve Kosovë-Serbi.
KFOR-i vazhdon të kontribuojë për një mjedis të sigurt për të gjithë njerëzit dhe komunitetet që jetojnë në Kosovë, në çdo kohë dhe në mënyrë të paanshme, në koordinim të ngushtë me Policinë e Kosovës dhe EULEX-in, në rolet e tyre përkatëse si reagues të sigurisë.
