Ministri i Financave, Hekuran Murati, ka reaguar pas publikimit të aktgjykimit të Gjykatës Kushtetuese lidhur me seancën konstituive. Ai tha se Lëvizja Vetëvendosje dhe kryesuesi Avni Dehari kanë vepruar në përputhje të plotë me Kushtetutën, duke iu referuar aktgjykimit të vitit 2014.
“Çfarë ka ndryshuar është interpretimi i Gjykatës, sepse ka ndryshuar fituesi – tash është Lëvizja Vetëvendosje e jo PDK-ja. Ky aktgjykim duket sikur është shkruar në zyrat e PDK-së”, ka shkruar Murati.
Postimi i plotë:
Kryesuesi i Seancës Konstituive z. Avni Dehari, dhe Grupi Parlamentar i Lëvizjes Vetëvendosje që nga data 15 prill e deri me 26 korrik kanë vepruar në përputhje të plotë me Kushtetutën, nëse marrim për bazë Aktgjykimin KO119/2014. Kushtetuta është e njëjta si në vitin 2014. Nuk ka ndryshuar. Por ajo çfarë ka ndryshuar është interpretimi që po i bëjnë Kushtetutës anëtarët e Gjykatës Kushtetuese, sepse ka ndryshuar fituesi – tash është Lëvizja Vetëvendosje e nuk është PDK-ja. Në fakt, ky Aktgjykimi i publikuar dje edhe duket sikur është shkruar në zyret e PDK-së, për dallim prej atij të datës 26 qershor që megjithatë linte përshtypjen se ka pasur kontribut edhe nga vetë Gjykata.
