Ambasada e Gjermanisë në Prishtinë ka reaguar pas nënshkrimit të marrëveshjes së bashkëfinancimit midis komunave të Prishtinës dhe Fushë-Kosovës me Kompaninë Rajonale të Ujësjellësit Prishtina, një hap i përbashkët drejt lumenjve më të pastër dhe trajtimit të ujërave të zeza në Kosovë.
“Në një kohë shumë të gjatë, ujërat e zeza të patrajtuara kanë ndotur lumenjtë e Kosovës, si Sitnica, duke kërcënuar shëndetin e njerëzve dhe mjedisin. Me mbështetjen e Bashkëpunimit Gjerman, Prishtina dhe Fushë-Kosova kanë vendosur ta ndryshojnë këtë”, thuhet në njoftim.
Sipas ambasadës, projekti synon modernizimin e rrjetit të kanalizimeve dhe kolektorëve kryesorë të ujit në Prishtinë, Graçanicë, Fushë-Kosovë dhe Obiliq. Kontributet financiare janë:
Prishtina: 9 milionë euro
Fushë-Kosova: 2 milionë euro
Qeveria gjermane: 42 milionë euro grant përmes KfW
Në fazat e ardhshme, projekti do të përfshijë një Impiant modern për Trajtimin e Ujërave të Zeza në Fushë-Kosovë, që do t’i shërbejë rreth 500,000 banorëve të rajonit. Ky impiant mbështetet financiarisht edhe nga BE-ja, Franca, BERZH dhe WBIF, dhe është plotësisht në përputhje me standardet e Bashkimit Europian.
Ambasada thekson se ky projekt e çon Kosovën një hap më afër integrimit evropian dhe një mjedisi të pastër për qytetarët.
