Gjykata Kushtetuese e Republikës së Kosovës ka shprehur shqetësim lidhur me deklaratat e fundit të disa zyrtarëve të lartë shtetëror dhe të zgjedhurve politikë, të cilat i ka cilësuar si të pamatura dhe cenim të parimeve kushtetuese.
Në reagimin e saj thuhet se pavarësia e Gjykatës Kushtetuese nuk është privilegj i gjyqtarëve, por një prej shtyllave kryesore të shtetit të së drejtës.
“Pavarësia dhe paanshmëria e Gjykatës Kushtetuese të Republikës së Kosovës janë të mbrojtura me Kushtetutë, dhe asnjë institucion, parti politike apo individ nuk mund të ndërhyjë në punën e saj”, thekson Gjykata.
Tutje, theksohet se çdo përpjekje për ushtrimin e presionit mbi gjyqtarët kushtetues përbën shkelje të parimit të ndarjes së pushteteve dhe dëmton besimin e qytetarëve në sundimin e ligjit e në demokracinë e vendit.
“Vendimet e Gjykatës Kushtetuese bazohen ekskluzivisht në Kushtetutë, në praktikën gjyqësore dhe në standardet ndërkombëtare për mbrojtjen e të drejtave dhe lirive të njeriut. Çdo deklaratë që tenton të relativizojë ose paragjykojë vendimet e Gjykatës është e papërgjegjshme dhe e dëmshme për zhvillimin demokratik të vendit”, theksohet në reagim.
Reagimi i plotë:
REAGIM
Gjykata Kushtetuese e Republikës së Kosovës shpreh shqetësimin e saj përkitazi me deklarimet e pamatura të zyrtarëve të lartë shtetëror dhe të zgjedhurve politikë.
Pavarësia e Gjykatës Kushtetuese nuk është privilegj i gjyqtarëve të saj, por është themel i shtetit të së drejtës.
Pavarësia dhe paanshmëria e Gjykatës Kushtetuese të Republikës së Kosovës janë të mbrojtura me Kushtetutë, dhe asnjë institucion, parti politike apo individ nuk mund të ndërhyjë në punën e saj. Çdo përpjekje për të ushtruar presion mbi gjyqtarët kushtetues përbën cenim të parimit themelor të ndarjes së pushteteve dhe minon besimin e qytetarëve në sundimin e ligjit dhe në vetë demokracinë.
Vendimet e Gjykatës Kushtetuese bazohen ekskluzivisht në Kushtetutën e Republikës së Kosovës, në praktikën e saj gjyqësore, si dhe në standardet ndërkombëtare për mbrojtjen e të drejtave dhe lirive themelore të njeriut. Rrjedhimisht, çdo deklaratë që tenton të relativizojë apo paragjykojë vendimet e Gjykatës Kushtetuese është jo vetëm e papërgjegjshme, por edhe e dëmshme për zhvillimin demokratik të vendit.
Gjykata apelon tek të gjitha palët që të respektojnë pavarësinë e saj, të përmbahen nga deklaratat që cenojnë integritetin e gjyqtarëve dhe vendimmarrjen e tyre të pavarur, dhe të kontribuojnë në forcimin e rendit kushtetues.
Vetëm përmes respektimit të këtij parimi themelor mund të garantohet një shoqëri e drejtë, demokratike dhe funksionale për të gjithë qytetarët e Kosovës.
