Kadri Kryeziu, në një reagim pas arrestimit të Fatmir Shehollit, ka përmendur Enver Hasanin dhe grupet mediatike ku ai pretendon se është i përfshirë, duke nënvizuar se çdo përgjegjësi mbetet personale.
Pas arrestimit të Fatmir Shehollit nën dyshimet për spiunazh në dobi të Serbisë, profesori i së drejtës Kadri Kryeziu ka reaguar me një postim në Facebook që ka ngjallur debat për tonin e tij ironik dhe aludimet e tërthorta ndaj Enver Hasanit.
Në postim, Kryeziu përmend një bisedë me një student që e pyet për dallimin mes tij dhe Hasanit, duke e cituar: “Profesor, ju jeni jurist më i mirë se Enveri, si njeri.” Më tej, ai shton me ironi se nëse Sheholli do të ishte afër tij, “sot do kishte shumë gjyqe publike”, duke lënë të kuptohet se Hasani ka lidhje me “grupe koordinuese në WhatsApp me të gjitha mediat”.
Në fund, Kryeziu thekson se nuk merret me “ato punë” dhe se përgjegjësia është gjithmonë individuale, një frazë që shumë e kanë lexuar si distancim nga lidhjet politike dhe mediatike që ai sugjeron në mënyrë të tërthortë.
