Një sulm ajror izraelit ndaj një makine në Libanin jugor të mërkurën vrau një person dhe plagosi 11, përfshirë studentë në një autobus aty pranë, thanë Ministria e Shëndetësisë dhe media shtetërore.
Sulmi në fshatin Tiri erdhi disa orë pas një sulmi me dron izraelit në kampin e refugjatëve palestinezë Ein el-Hilweh në Libanin jugor, ku u vranë 13 persona dhe u plagosën disa të tjerë, raporton Associated Press.
Sulmi i së martës në mbrëmje ishte më vdekjeprurësi midis dhjetëra sulmeve izraelite që nga një armëpushim në luftën Izrael-Hezbollah një vit më parë.
Agjencia Shtetërore Kombëtare e Lajmeve tha se një autobus shkollor me nxënës po kalonte rastësisht pranë makinës që u godit të mërkurën në mëngjes.
Shoferi i autobusit dhe disa nxënës u plagosën, thuhet në raport. Identiteti i personit që vdiq në makinë nuk u bë menjëherë i qartë. Ushtria izraelite nuk bëri komente të mërkurën.
Në vendin e ngjarjes, ndihmësit mjekësorë kërkuan mbetje njerëzore rreth një muri të njollosur me gjak. Disa makina u dogjën dhe xhama të thyer e mbeturina ishin të shpërndara në tokë.
Të martën në mbrëmje, ushtria izraelite tha se goditi një kompleks stërvitjeje të Hamasit që po përdorej për të përgatitur një sulm kundër Izraelit dhe ushtrisë së tij. Ajo shtoi se ushtria izraelite do të vazhdojë të veprojë kundër Hamasit kudo që ai vepron.
Hamasi e dënoi sulmin dhe mohoi në një deklaratë se sheshi i lojërave sportive që u godit ishte kompleksi i tij i stërvitjes.
