Zyrtarë dhe oficerë të lartë të Ministrisë së Mbrojtjes dhe të Forcës së Sigurisë së Kosovës kanë zhvilluar një vizitë njëjavore në Berlin, ku morën pjesë në seminarin “Sfidat e lidershipit të shekullit 21”.
Gjatë qëndrimit, delegacioni u përfshi në një sërë ligjëratash dhe takimesh pune që trajtuan kulturën e veteranëve në Gjermani, filozofinë bashkëkohore të lidershipit dhe praktikat moderne të udhëheqjes ushtarake.
Programi i vizitës përfshiu takime në Zyrën e Komisionerit të Forcave të Armatosura, Komisionin e Mbrojtjes, Qendrën e Karrierës së Bundeswehr-it, si dhe Fondacionin Kërkimor për Shkencë dhe Politikë. Delegacioni u mirëprit nga nënkolonel Friedrich von Bismark dhe oficerë të lartë gjermanë, me të cilët u shkëmbyen përvoja dhe praktika të suksesshme në fushën e menaxhimit të burimeve njerëzore, lidershipit ushtarak dhe përkujdesjes ndaj veteranëve.
Në Ambasadën e Republikës së Kosovës në Berlin u mbajt edhe ceremonia e diplomimit të katër kadetëve të FSK-së, të cilët përfunduan me sukses studimet në Gjermani, duke reflektuar një hap tjetër të rëndësishëm në rritjen e kapaciteteve profesionale të FSK-së.
Gjatë qëndrimit, delegacioni realizoi vizita në institucione shtetërore gjermane dhe aktivitete kulturore, me qëllim njohjen më të thelluar të kryeqytetit gjerman dhe praktikave institucionale atje.
Kjo vizitë synon forcimin e bashkëpunimit dypalësh Kosovë–Gjermani në fushën e mbrojtjes, avancimin profesional të kuadrove të Forcës së Sigurisë së Kosovës dhe ngritjen e standardeve të udhëheqjes ushtarake.
