Një djalë trevjeçar ka befasuar mjekët me përparimin e tij, duke u bërë personi i parë në botë me sëmundjen e tij të rëndë që ka marrë një terapi gjenetike revolucionare.
Oliver Chu ka një kondicion të rrallë të trashëguar të quajtur sindroma Hunter – ose MPSII – e cila shkakton dëme progresive në trup dhe tru.
Në rastet më të rënda, pacientët me këtë sëmundje zakonisht vdesin para moshës 20-vjeçare. Efektet ndonjëherë përshkruhen si një lloj demence e fëmijërisë.
Për shkak të një gjeni të dëmtuar, para trajtimit Oliver nuk mund të prodhonte një enzimë të domosdoshme për të mbajtur qelizat të shëndetshme, shkruan BBC.
Në një rast të parë në botë, stafi mjekësor në Manchester ka provuar të ndalojë sëmundjen duke ndryshuar qelizat e Oliverit me anë të terapisë gjenetike.
Simon Jones, i cili po udhëheq përpjekjet e trialit, i tha BBC-së: “Kam pritur 20 vjet për të parë një djalë si Ollie që të përparojë kaq mirë, dhe është thjesht kaq emocionuese”.
Në qendër të kësaj historie të jashtëzakonshme është Oliver – i pari nga pesë djem në mbarë botën që do të marrin trajtimin – dhe familja Chu nga Kalifornia, e cila ka vënë besimin e saj te ekipi mjekësor në Spitalin Mbretëror të Fëmijëve të Manchesterit.
Një vit pas fillimit të trajtimit, Oliver tani duket se po zhvillohet normalisht.
“Sa herë flasim për këtë, më vjen të qaj sepse është thjesht kaq e mrekullueshme”, thotë nëna e tij, Jingru.
BBC-ja ka ndjekur historinë e Oliverit për më shumë se një vit – duke përfshirë mënyrën se si shkencëtarët në Mbretërinë e Bashkuar zhvilluan për herë të parë terapinë gjenetike pionier dhe si triali mjekësor që po zhvillojnë pothuajse nuk u realizua për shkak të mungesës së fondeve.
