Korporata Energjetike e Kosovës priti sot një delegacion nga Bashkimi Evropian, të udhëhequr nga shefi i Seksionit të Bashkëpunimit, Hubert Perr, me të cilët diskutuan mbi projektet kyçe të modernizimit dhe rehabilitimit në Termocentralin Kosova B.
Kryeshefi ekzekutiv i KEK-ut, Gramos Hashani, prezantoi një përmbledhje të detajuar të investimeve kapitale të Korporatës, duke theksuar rëndësinë e projektit të financuar nga BE “Masat për Uljen e Pluhurit dhe NOx në TC Kosova B”, një nismë madhore mjedisore e dizajnuar për të reduktuar ndjeshëm emetimet e grimcave dhe për të përmirësuar cilësinë e ajrit.
Hashani theksoi se KEK ka përfunduar me sukses projektin e dilatimit të kaldajave për njësitë B1 dhe B2 në vitin 2023, duke përmbushur parakushtin teknik thelbësor për zbatimin e këtij projekti të financuar nga BE dhe se me arritjen e këtij momenti kyç KEK-u konfirmoi se është plotësisht i gatshëm të nisë zbatimin.
Përfaqësuesit e BE-së riafirmuan zyrtarisht se Bashkimi Evropian në Kosovë po punon drejt një fillimi të suksesshëm të punimeve të planifikuara për prillin 2026, duke shënuar një hap vendimtar përpara në performancën mjedisore të Kosovës dhe modernizimin e sektorit të energjisë.
Rezultati i këtij takimi nënvizon partneritetin e fuqishëm mes KEK-ut dhe BE-së, dhe përfaqëson një avancim të rëndësishëm drejt prodhimit më të pastër të energjisë, rritjes së besueshmërisë operacionale dhe përafrimit të plotë me standardet mjedisore të BE-së për emetimet e pluhurit dhe NOx.
Në kiminë atmosferike, NOx është shkurtesa për oksidin nitrik (NO) dhe dyoksidin e azotit (NO2). Këto gazra kontribuojnë në formimin e smogut dhe shiut acid, si dhe ndikojnë në ozonin troposferik, raporton KosovaPress.
