Misioni i NATO-s në Kosovë, KFOR, ka rikonfirmuar përkushtimin ndaj mbështetjes së përpjekjeve për sigurinë dhe të drejtat e grave dhe vajzave në Kosovë, gjatë hapjes së fushatës së OKB-së “16 Ditët e Aktivizmit kundër Dhunës me Bazë Gjinore” në Prishtinë.
Komandanti i misionit të udhëhequr nga NATO, KFOR, gjeneralmajor Özkan Ulutaş, mori pjesë në ngjarjen hapëse të fushatës së OKB-së “16 Ditët e Aktivizmit kundër Dhunës me Bazë Gjinore” në Prishtinë, ku KFOR rikonfirmoi përkushtimin për mbështetjen e përpjekjeve ndërkombëtare që promovojnë sigurinë, dinjitetin dhe të drejtat e të gjitha grave dhe vajzave në Kosovë.
“Tema e këtij viti, “BASHKOHUNI për t’i dhënë fund dhunës digjitale ndaj të gjitha grave dhe vajzave”, vë në pah rritjen e ngacmimeve online, abuzimit dhe formave të tjera të dhunës digjitale, duke bërë thirrje për veprim të përbashkët nga institucionet, organizatat dhe individët”, thuhet në njoftim.
KFOR theksoi se vazhdon të zbatojë mandatin e saj të bazuar në Rezolutën e Këshillit të Sigurimit të OKB-së, për të kontribuar në një ambient të sigurt dhe të qetë për të gjithë njerëzit që jetojnë në Kosovë dhe për lirinë e lëvizjes, në çdo kohë dhe në mënyrë të paanshme.
