Kreu i LDK-së, Lumir Abdixhiku, ka reaguar pas zhvillimeve lidhur me intervistimin e ministrit Faton Peci nga Prokuroria Speciale, duke shprehur shpresën se Kosova po hyn në një epokë të re të drejtësisë.
“Një ditë do të vijnë prokurorë me guxim e integritet që do të trajtojnë çdo akt korruptiv – sidomos atë të pushtetarëve,” tha Abdixhiku, duke theksuar se pas vite pritjeje, një ndryshim i tillë mund të ketë nisur.
Sipas tij, në këtë epokë të re, “paratë e vjedhura do të kthehen cent për cent – nga të gjithë ata që janë mbi ligjin.”
Postimi i plotë:
Edhe në Kosovë, sikurse në secilin vend tjetër në Evropë, do të del një ditë një prokuror a dy, djem e vajza të reja e të rinj, që kanë guxim e integritet të trajtojnë secilin akt korruptiv; secilën hajni.
Edhe atë të pushtetarëve.
Sidomos atë të pushtetarëve.
Atë ditë do të mburremi të gjithë – me shtetin tonë, me arritjet tona; me integritetin e njerëzve që i shërbejnë popullit të tyre pa frikë. Atë ditë, piskamat e politikanëve që mbrojnë hajninë vetëm pse hajni është i tyre – atë që u bërtet me fakte mu para syve – atë ditë, këto piskama nuk do të kenë më asnjë vlerë.
Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë. Në këtë epokë, një e vërtetë e pashmangshme do të qëndrojë gjithëherë – se paret e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë!
