Kryetari i Partisë Demokratike të Kosovës, Bedri Hamza, ka zhvilluar një takim me Ramiz Lladrovcin, të cilin e ka quajtur “mik zemërhapur”, duke ritheksuar mbështetjen e pakushtëzuar për të dhe rolin e tij në PDK.
Hamza tha se Lladrovci “ka qenë, është dhe mbetet PDK”, ndërsa vuri në pah se Drenasi është tashmë komuna e shtatë ku, sipas tij, vizioni i heronjve të luftës dhe paqes vazhdon të mbetet bastion i sigurt i kësaj partie.
Ai theksoi se energjitë politike dhe qytetare në Drenas, komunë që identifikohet me historinë e UÇK-së, dëshmorëve dhe martirëve, si dhe qeverisjen e mirë, do të shërbejnë si dëshmi e unitetit të PDK-së në zgjedhjet e 28 dhjetorit.
Hamza ka publikuar edhe një fotografi bashkë me Lladrovcin dhe kryetarin e BDI-së, Ali Ahmeti, i cili si duket ka qenë “ndërmjetësues” i këtij pajtimi.
Postimi i plotë:
Në takim me mikun tim, zemërhapur, ritheksuam pa kushte se Ramiz Lladrovci ka qenë, është dhe mbetet PDK.
Drenasi është komuna e shtatë ku vizioni i heronjve tanë të luftës dhe paqes vazhdon të jetë bastion i fitoreve, në zemrën e Kosovës.
Energjitë e bastionit të UÇK-së dhe PDK-së, në Drenasin e dëshmorëve dhe martirëve, me qeverisjen e shkëlqyer, do të jenë dëshmi e unitetit tonë për fitoren e 28 Dhjetorit.
Të bashkuar, gjithmonë të fituar!
