Deputetja e LDK-së, Hykmete Bajrami, ka reaguar pas zhvillimeve në seancën e sotme të Kuvendit, duke e quajtur atë momentin ku, sipas saj, “u pa qartë mashtrimi dhe përbuzja e vullnetit të qytetarëve” nga Albin Kurti dhe Lëvizja Vetëvendosje.
Bajrami ka njoftuar se mungoi në seancë për arsye shëndetësore, por theksoi se ajo që ndodhi sot vetëm e vërtetoi atë që LDK-ja ka paralajmëruar që nga 9 shkurti: se Kurti nuk ka numrat për të formuar qeverinë, pavarësisht deklarimeve të tij të vazhdueshme.
Sipas saj, Kurti i ka humbur Kosovës “muaj e vite” me keqqeverisje, korrupsion, masa ndëshkuese dhe varfërim të qytetarëve, ndërsa sot u dëshmua edhe një herë “mashtrimi i madh” për pretendimet e tij paszgjedhore.
“Thënë troç kjo kastë politike ja humbi Kosovës plotë 5 vjet, por fituan shumë ata dhe rrethi i tyre, fituan nga keqpërdorimi i të gjitha resurseve shtetërore në kurriz të qytetarëve për të cilat një ditë do të japin përgjegjësi”.
Bajrami thekson se qytetarët do ta ndëshkojnë Kurtin dhe Vetëvendosjen për arrogancën politike, sidomos për këmbënguljen që posti i kryetares së Kuvendit t’i jepej vetëm një kandidate e vetme, për dështimin në krijimin e një koalicioni me cilëndo parti shqiptare dhe për humbjen e 15 ditëve të tjera pas tentativave të dështuara për zgjedhjen e kryeministrit.
Ajo e akuzon Kurtin dhe VV-në për “5 vite të humbura për Kosovën”, duke listuar korrupsionin në energji, rritjen e çmimeve, mosrealizimin e premtimeve, ngecjet në infrastrukturë, rënien në ekonomi, arsim e shëndetësi, si dhe përpjekjet për të blerë vota përmes skemave publike.
“Fillimi i fundit politik të Albin Kurtit ka nisur më 9 shkurt. Vula e këtij fundi do të jetë dita e zgjedhjeve të reja”, përfundon Bajrami.
