Ish-kryeministri dhe gjenerali i luftës Agim Çeku është rikthyer në skenën politike, duke iu bashkuar listës së Aleancës për Ardhmërinë e Kosovës (AAK) për zgjedhjet e parakohshme të 28 dhjetorit.
Në një intervistë për KosovaPress, Çeku ka zbardhur motivet e këtij rikthimi, duke theksuar se nuk lëviz nga ambiciet personale, por nga një ndjenjë e thellë detyre ndaj vendit, i cili, sipas tij, po kalon një periudhë stagnimi, sanksionesh dhe zbehjeje të mbështetjes ndërkombëtare.
Çeku thotë se qëllimi i tij kryesor është të jetë në krah të kryetarit të AAK-së Ramush Haradinaj dhe të ndihmojë Kosovën në këtë moment delikat.
Çeku: Kemi mendje të pushtuara shumë në skenën politike
“Është një bllokadë njëvjeçare, një stagnim i Kosovës, një zbehje e mbështetjes për Kosovën, sanksione ndaj Kosovës, dhe këto janë arsyet… Nganjëherë, lufta për çlirimin e mendjeve të pushtuara, është shumë më e vështirë sesa lufta ballë për ballë me armikun. Kështu që, unë e mendoj që vitet e fundit, kemi manipulime me njerëz, njerëz me mendje të lehta, po me njerëz me mendje të vogël, lejohen që të manipulohen, edhe atëherë njerëzit e manipuluar apo mendja e manipuluar bëhet shpeshherë edhe e rrezikshme për vendin, për shoqërinë. Edhe fatkeqësisht ne kemi të bëjmë me një politikë shumë të dominuar nga mashtrimet, manipulimet me masa, me njerëz, edhe kjo e bën një, thashë, është shumë e vështirë çlirimi i mendjeve të pushtuara. Kemi mendje të pushtuara shumë në skenën politike”, ka thënë Çeku.
Ai tha se AAK si pjesë e Parlamentit të ardhshëm do të punojë që Kosova të rikthejë mbështetjen e partnerëve të saj strategjikë, pasi kjo mbështetje është zbehur dukshëm.
Çeku: Hyrja në NATO është objektivi numër një
“Po. A sigurohet Kosova duke pasur mbështetës të fuqishëm prapa krahësh, aleatë, partnerë të fuqishëm, duke qenë pjesë e NATO-s. A për me qenë pjesë e NATO-s, hyn kjo e para, që të kemi mbështetjen e fuqishme të Shteteve të Bashkuara të Amerikës në radhë të parë, të Britanisë së Madhe, Gjermanisë, Francës, vendeve më të fuqishme të NATO-s. Mendoj se Haradinaj e ka këtë kauzë. Unë e mbështes plotësisht dhe kjo është njëra prej arsyeve pse iu kam bashkuar atij, sepse po e shoh si njeri ushtarak që kam qenë gjatë gjithë jetës, Kosova ende nuk është e siguruar dhe në këto rrethana gjeopolitike në botë e Evropë, më bëjnë të shqetësohem për të ardhmen e Kosovës, se sa do të jetë e siguruar. Nuk kam shqetësim për sigurinë e brendshme, por kam shqetësim për Kosovën në përgjithësi. Mendoj se hyrja në NATO është objektivi numër një ku duhet të orientohen dhe fokusohen të gjitha energjitë dhe përpjekjet, ka thënë Çeku.
