Një ngjarje e rëndë ka ndodhur mesditën e sotme në qytetin e Vlorës, ku një person është sulmuar me thikë, duke shkaktuar panik dhe shqetësim tek banorët e zonës.
Sipas informacioneve paraprake, ngjarja ka ndodhur në afërsi të Spitalit Rajonal të Vlorës, një zonë mjaft e frekuentuar, çka e bën edhe më të rëndë këtë incident.
Raportohet se një 33-vjeçar është qëlluar dy herë me mjet prerës nga një person ende i paidentifikuar. Menjëherë pas ngjarjes, i plagosuri është transportuar me urgjencë në ambientet e kirurgjisë në spital, ku aktualisht po merr ndihmën e nevojshme mjekësore.
Burime pranë bluzave të bardha bëjnë me dije se ai ndodhet nën kujdes intensiv, ndërsa gjendja e tij shëndetësore është ende nën vlerësim.
Ndërkohë, forca të shumta policie kanë mbërritur në vendngjarje dhe kanë nisur hetimet për të zbardhur plotësisht rrethanat e kësaj ngjarjeje. Po punohet për identifikimin dhe kapjen e autorit, si dhe për të kuptuar motivet që çuan në këtë sulm të dhunshëm.
Gjithashtu, policia po mbledh dëshmi nga persona që mund të kenë qenë dëshmitarë në momentin e ngjarjes, si dhe po analizon pamjet e kamerave të sigurisë në zonë.
