FBI ka lëshuar një paralajmërim shqetësues për amerikanët, ndërsa rritet frika se Irani mund të godasë SHBA-në përmes grupeve terroriste të ndërmjetme (proksi).
Ekipet e kundërterrorizmit dhe kundërzbulimit të FBI-së janë në gjendje të lartë gatishmërie në të gjithë vendin, sipas një zyrtari të agjencisë.
Frika nga terrorizmi është rritur pas sulmeve ushtarake të Donald Trump ndaj Iranit, ndërsa qarkullojnë raportime se udhëheqësi suprem i regjimit islamik është vrarë.
Irani përdor një rrjet grupesh militante proksi në mbarë botën për të kryer sulme të dhunshme kundër vendeve perëndimore.
FBI-ja nuk bëri të ditur se sa do të zgjasë kjo gjendje alarmi. Ndërkohë, Kristi Noem tha se Departamenti i Sigurisë Kombëtare është “në koordinim të drejtpërdrejtë me partnerët tanë federalë të inteligjencës dhe zbatimit të ligjit, ndërsa vazhdojmë të monitorojmë nga afër dhe të pengojmë çdo kërcënim të mundshëm ndaj atdheut.”
Me urdhër të presidentit, ushtria amerikane lëshoi raketa Tomahaëk ndaj Iranit në një operacion të përbashkët me Izraelin, duke angazhuar avionë të Forcave Ajrore dhe Marinës. Irani iu përgjigj agresionit duke nisur “sulme hakmarrëse” ndaj bazave ushtarake amerikane në të gjithë Lindjen e Mesme.
Teherani ka goditur qendrën e shërbimit të Flotës së Pestë në Manama, Bahrein, dhe pretendon se ka goditur baza në të gjithë rajonin, përfshirë në Katar, Emiratet e Bashkuara Arabe dhe Kuvajt.
Irani po përdor gjithashtu dronë kamikazë për të goditur ndërtesa banimi dhe aeroporte në Lindjen e Mesme. Pamje të publikuara të shtunën në mëngjes treguan një dron iranian që u përplas në një pallat shumëkatësh në Bahrein.
Presidenti paralajmëroi se trupat amerikane mund të humbasin jetën, duke shtuar se “mund të kemi viktima”. Numri i viktimave nga sulmet hakmarrëse të Iranit ndaj bazave amerikane mbetet i paqartë.
