Ish-kryeministri dhe lideri historik i së majtës shqiptare, Fatos Nano, u përcoll sot për në banesën e fundit me nderime shtetërore.
Në ceremoninë e zhvilluar në Pallatin e Kongreseve morën pjesë krerët më të lartë të shtetit shqiptar, përfaqësues të opozitës, përfaqësues nga Kosova dhe shqiptarë nga rajoni.
Në këtë ceremoni të lartë, vëmendje të veçantë mori takimi mes kryeministrit të Shqipërisë, Edi Rama, dhe kryeministrit në detyrë të Kosovës, Albin Kurti, të cilët nuk njihen për marrëdhënie të mira politike.
Kurti dhe Rama duke u pershendetur
Dy liderët u panë teksa shkëmbyen disa fjalë gjatë homazheve dhe ecën së bashku drejt Kryeministrisë, ku arkëmorti i Fatos Nanos bëri kalimin simbolik përpara institucionit që ai dikur drejtoi për vite me radhë.
Pas ceremonisë shtetërore, Nano u përcoll për në varrezat e Sharrës, ku u zhvilluan nderimet e fundit për një prej figurave më të rëndësishme të politikës shqiptare pas viteve ’90.
Ndryshe, kryeministri në detyrë i Republikës së Kosovës, Albin Kurti, në ceremoni ishte i shoqëruar nga nënkryetarja e Kuvendit të Kosovës, Albulena Haxhiu.
Kurti vendosi kurorë të freskët me lule dhe bëri homazhe pranë arkivolit të të ndjerit.
Ai u shprehu ngushëllime familjarëve, miqve dhe bashkëpunëtorëve të tij.
