Halil Geci ka vazhduar me kritika ndaj LDK-së dhe politikave të saj. Këtë herë përmes një postimi në Facebook e kritikoi ashpër këtë parti për bashkëpunimin dhe koalicionet me PDK-në.
Sipas Gecit, koalicioni LDK-PDK ishte një goditje ndaj çdo idealizmi që ka mbijetuar në politikën e Kosovës.
Madje, e akuzoi LDK-në, duke thënë se për të nuk ka rëndësi e kaluara.
“LDK-ja harroi viktimat, PDK-ja i la duart nga e kaluara. Dhe të dyja, mbi heshtjen e të vrarëve, ngritën një qeveri që e shkel çdo parim moral.
Koalicioni LDK–PDK nuk është thjesht një marrëveshje politike — është një pazar me kujtesën kolektive, një marrëveshje e shëmtuar për pushtet”, shkroi Geci ndër të tjera, përcjell “Bota sot”.
Shkrimi i plotë
Kur parimet bëhen monedhë për pushtet: Rasti LDK-PDK
Kur parimet shndërrohen në monedhë për pushtet, vrasësit shpërblehen, jo dënohen. Partnerë të rrezikshëm, që dikur quheshin kriminelë, sot ulen në tavolinë dhe ndajnë pushtetin. Kjo është tragjedia e LDK-së.
LDK-ja harroi viktimat, PDK-ja i la duart nga e kaluara. Dhe të dyja, mbi heshtjen e të vrarëve, ngritën një qeveri që e shkel çdo parim moral.
Koalicioni LDK–PDK nuk është thjesht një marrëveshje politike — është një pazar me kujtesën kolektive, një marrëveshje e shëmtuar për pushtet.
LDK-ja i harroi akuzat për vrasje politike. I harruan emrat si Xhemajl Mustafa, Haki Imeri, Enver Maloku, Shaban Mani, Ukë Bytyçi, Ismet Raci, Besim Dajaku, Bekim Kastrati,dhe të tjerë — ata që dikur i quanin “martirë të lirisë”. LDK-ja sot bën pazar për pushtet me ata që dikur i akuzonte si vrasës.
Ky koalicion në vazhdimësi ishte një goditje ndaj çdo idealizmi që ka mbijetuar në politikën kosovare. Në vend të drejtësisë, pasurimi i disa individëve është bërë qëllimi.
Për LDK-në, e kaluara nuk ka rëndësi — pasi çdo mundësi për pushtet është më e rëndësishme se çdo premtim për drejtësi.
Koalicioni i vazhdueshëm LDK-PDK është një tradhëti ndaj çdo kauze për të vërtetën. LDK-ja e shpalli betejën për drejtësinë dhe kundër krimit, por tani ka treguar se është pjesë e një koalicioni që e ka bërë drejtësinë negociueshme.
LDK-ja, që dikur ishte simbol i paqes dhe lirisë, sot ka shkelur mbi të gjitha ato ideale për t’u ulur me ata që dikur i quante armiq të lirisë. Pushteti dhe interesa personale janë gjithçka që i mbetet.
Koalicionet në mes këtyre dy partive ishin dhe do të mbeten më shumë se një marrëveshje për pushtet — është shenjë e një tradhëtie të thellë ndaj viktimave, të cilët nuk meritojnë të harrohen.
LDK-ja ka vdekur si parti e moralit dhe e drejtësisë — dhe ka lindur si një makinë për të ndarë pushtetin, pa asnjë turp.
