1
Mbi 1.6 milionë myslimanë e përmbyllën para agimit të premtes ritualin e Haxhit, duke hedhur gurë ndaj djallit në Luginën e Minas, në periferi të Mekës, në një nga momentet më të fuqishme shpirtërore të pelegrinazhit më të madh islam.
Rituali simbolik i gjuajtjes me shtatë gurë ndaj secilit prej tre mureve që përfaqësojnë djallin, shënon fundin e Haxhit dhe fillimin e festës së madhe të Kurban Bajramit për miliona myslimanë në të gjithë botën.
Pamjet nga Xhamia e Madhe në Mekë treguan mijëra besimtarë që falën namazin e Bajramit në vendin më të shenjtë të Islamit. Edhe në Jerusalem, lutjet e Bajramit u mbajtën jashtë xhamisë Al-Aksa – një tjetër simbol kyç për myslimanët.
Por ndryshe nga atmosfera e qetë në Mekë, në Gaza dhe Liban, festa u prit me trishtim dhe frikë.
Në Khan Yunis të Gazës, besimtarët falën Bajramin mes rrënojave të xhamisë Al-Bani, e cila ishte shkatërruar nga sulmet ajrore izraelite. Ndërkohë, në prag të festës, Izraeli goditi periferitë jugore të Bejrutit, duke pretenduar se kishte shënjestruar një bazë nëntokësore për prodhimin e dronëve të Hezbollahut.
Këto zhvillime ndodhën vetëm një ditë pas grumbullimit të miliona pelegrinëve në malin Arafat, ku ata recituan vargje nga Kurani dhe u lutën në vendin ku besohet se Profeti Muhamed mbajti predikimin e tij të fundit.
Autoritetet saudite zbatuan masa të rrepta për t’iu shmangur tragjedive të vitit të kaluar, kur mbi 1.300 persona humbën jetën për shkak të temperaturave ekstreme gjatë Haxhit.
