Akademia e “Flakës së Janarit” në Gjilan, e dedikuar këtë vit për përkujtimin e masakrës së Reçakut, u zhvillua sot me pjesëmarrjen e kryeministrit në detyrë të Republikës së Kosovës, Albin Kurti.
Në fjalimin e tij, Kurti theksoi rëndësinë e ruajtjes së traditës dhe kujtesës historike si themel i zhvillimit të shoqërisë dhe ndërtimit të institucioneve të forta të shtetit.
“Në rrugën e pafund të quajtur histori, në atë udhë të popujve që synojnë zhvillimin e qytetërimit të tyre dhe përparimin e vazhdueshëm të shoqërisë, ndërtimi i themeleve të forta dhe ruajtja e traditave të normuara është një parakusht kyq. Kush e ka menduar në janarin e vitit 1992, kur për herë të parë u organizua ‘Flaka e Janarit’, që ky festival kulturor e kombëtar, do t’i mbijetojë kaq gjatë kohës, duke u kthyer në një organizim tradicional”, tha ai.
Kurti rikujtoi se ‘Flaka e Janarit’ fillimisht nisi si shënim i 10 vjetorit të vrasjes së tre veprimtarëve politikë dhe patriotëve të paetur Jusuf e Bardhosh Gërvalla dhe Kadri Zeka, të vrarë më 17 janar të vitit 1982 në Gjermani nga Shërbimi Sekret Jugosllav.
Rreth këtij festivali, kujtoi Kurti, u përbashkua kujtimi edhe për rënien e Rexhep Malajt dhe Nuhi Berishës të vrarë nga policia jugosllave më 11 janar 1984 në Prishtinë.
“Një javë më parë i kujtuam Rexhep Malajn dhe Nuhi Berishën, kurse sot po vijmë në këtë akademi nga shtëpia e familjes së Kadri Zekës, ku ishim bashkë me kryetarin Alban Hyseni, teksa paradite ishim në Dobovik të Deçanit tek kulla muze e Jusuf e Bardhosh Gërvallës, bashkë me Donika Gërvallën, të bijën e Jusuf Gërvallës, aktualisht ministre në detyrë e Punëve të Jashtme dhe Diasporës”, theksoi Kurti.
Këto rrugëtime, këto vende, këta njerëz, këto data dhe ngjarje të lidhura nga e kaluara janë pikërisht ajo për të cilën duhet ta vë theksin sonte, tha tutje Kurti.
“E kam fjalën për rëndësinë e ruajtjes së traditës, për kultivimin e vlerave kombëtare dhe ndërtimin mbi themele të forta të atyre mureve të cilave lartësohet ngrehina jonë jetësore, gjegjësisht shtëpia jonë e quajtur Republika e Kosovës. Sepse pikërisht nën kulmin e kësaj shtëpie të përbashkët gjejnë strehë të gjithë njerëzit e atdheut tonë dhe miqtë tanë bashkë me rrëfimet e treguara mes nesh nga kujtesa jonë kolektive. E pikërisht prej tyre përbëhet dija dhe vetëdija jonë e përbashkët kulturore, politike dhe historike, brenda së cilës ne jetojmë si qenie politike dhe njerëzore, ku realizohemi si individë dhe si komunitet”, u shpreh Kurti.
Ai kujtoi edhe edicionin e tetë, kur më 15 janar të vitit 1999, programi i festivalit u shkurtua për shkak të masakrës së Reçakut, ku u vranë 45 civilë të pambrojtur.
“27 vite më vonë akademia e Flakës së Janarit i kushtohet masakrës së Reçakut, përkujtimit dhe nderimit të dëshmorëve të rënë atje në luftën e drejtë të popullit tonë për çlirimin e Kosovës nga Serbia armike, okupatore dhe shtypëse. Njerëzit tanë të vrarë e të rënë gjatë të kaluarës, historitë, angazhimet dhe fatet e tyre janë nyje rreth të cilave rrotullohen dhe lidhen rrugëtimet tona të kujtesës dhe të kontributit për brezat pasues. I kujtojmë dhe ndertojmë të rënët duke e mbajtur pranë njëri – tjetrit ne të gjallët”, theksoi Kurti.
Kryeministri në detyrë nënvizoi rolin e ambasadorit William Walker, i cili denoncoi këtë krim kundër njerëzimit dhe bëri të mundur që e vërteta për ngjarjet të shpërndahej ndërkombëtarisht.
“Për këtë rast duhet të përkujtojmë rolin unik të ambasadorit William Walker, si dëshmitar dhe denoncues i masakrës së Reçakut, si krim kundër njerëzimit. Ishte pikërisht deklarata e ambasadorit Walker, ajo që më 1999 ia bëri të qartë botës të vërtetën për krimet shtetërore të Serbisë në Kosovë. Kurse në kohën tonë na takon ne ta gjurmojmë dhe ta studiojmë këtë masakër në kontekstin politik e gjeopolitik, në kronologjinë e historisë më të re, duke i denoncuar urdhërdhënësit dhe ekzekutuesit e saj para drejtësisë, dhe duke lënë të rrëfyer e të shkruar historinë e masakrës së Reçakut për të gjithë brezat dhe njerëzimin”, tha ai.
Tutje Kurti tha se Prokuroria Speciale e Kosovës në dhjetor të vitit që sapo e lamë pas ngriti një aktakuzë për 21 persona lidhur me këtë masakër.
“Mes kujtimesh plotë respekt për të rënët, me mirënjohjen më të thellë për të gjallët dhe trashigimëtarët dhe duke besuar se rrugëtimi ynë i përbashkët që nga nderimi i të kaluarës, na shpie në ndërtimin e së ardhmes më lejoni të shpreh konsideratat e mia më të larta si kryeministër i Republikës së Kosovës për vuajtjet, dhembjet dhe humbjet tuaja dhe tonat, si sakrifica për lirinë, në të cilën po e kujtojmë, zhvillojmë dhe përparojmë vendin tonë”, nënvizoi Kurti.
Me këtë rast ai uroj që bashkëshortja e ambasadorit Walker, të rikuperohet dhe të ketë shëndet të mirë, pasi gjatë ceremonisë u bë e ditur se ka pësuar problem shëndetësor, duke pamundësuar edhe ardhjen e konfirmuar të ambasadorit William Walker në këtë akademi.
