Ndërrimi i dytë i minatorëve të Trepçës ka mbetur i bllokuar brenda horizontit 11, pas një defekti në pajisjet elektrike që ka shkaktuar ndërprerjen e furnizimit me energji.
Sipas informacioneve, gjithsej 63 minatorë ndodhen brenda minierës. Ata janë pjesë e ndërrimit të dytë, i cili përfundon në orën 23:00.
Për situatën ka reaguar edhe ministrja e Ekonomisë, Artane Rizvanolli, e cila përmes një postimi në Facebook ka bërë të ditur se minatorët janë në gjendje të mirë shëndetësore.
Postim i plotë:
Sipas informatave nga menaxhmenti i Trepçës, minatorët që ndodhen brenda minierës pas defektit në pajisjet elektrike janë në gjendje të mirë. Ata janë pjesë e ndërrimit të dytë, i cili përfundon në orën 23:00.
Ekipet teknike po punojnë për sanimin e defektit dhe rikthimin e furnizimit me energji. Ndërkohë, po organizohet dalja graduale e minatorëve përmes daljes emergjente. Menaxhmenti është në vendngjarje, ku kanë qenë edhe policia dhe zjarrfikësit.
