Sindikata e Pavarur e Minatorëve të Trepçës ka bërë të ditur se lëndët e iniciuara në Gjykatën Themelore në Mitrovicë, lidhur me mospagesën e trustit pensional nga ndërmarrja “Trepça”, tashmë kanë filluar të shqyrtohen.
Sindikata, përmes një njoftimi ka deklaruar se ka pasur shpresa se këto çështje do të zgjidheshin në favorin e saj, meqë e drejta, sipas saj është në anën e punëtorëve që tash e gjashtë vite janë dëmtuar nga mospagesa e trustit.
Megjithëse, sipas informatave zyrtare të SPMT-së, gjykata është duke i refuzuar kërkesat e tyre, “me arsyetimin se ne nuk kemi të drejt me kërku mbrojtje gjyqesore për realizimin e kërkesave tona për pagesen e kontributit pensional nga punëdhënësi!”.
Sipas njoftimit, shumat që ndërmarrja i ka borxh minatorëve tashmë kanë kaluar në miliona euro.
“Përveç mungesës së kontributeve, jemi dëmtuar edhe nga humbja e fitimeve vjetore që Trusti do t’i kishte realizuar përmes investimeve ndërkombëtare. Është për të ardhur keq që statusi i minatorit në Kosovë mbetet i rëndë. Pas dekadash pune të vështira dhe profesioneve me rrezik të lartë, shumë prej jush përballeni me pensione minimale, ndërsa edhe mjetet që u takojnë nga trusti ju mungojnë, duke e vështirësuar edhe më shumë jetesën”.
“Ne vazhdojmë të kemi besim në drejtësi, por në këtë rast, mendojmë se gjykata nuk i ka vlerësuar mjaftueshëm dëmet e shkaktuara minatorëve. Vendimet e deritanishme kanë përcaktuar se është detyrë e ATK-së të detyrojë ndërmarrjet për këto pagesa, por tash e gjashtë vite ATK nuk ka ndërmarrë asnjë veprim serioz ndaj Trepçës sh.a., e cila vazhdon të mos i përmbushë obligimet e saj”.
“Për njoftimin tuaj të nderuar minator, ndërmarrja për të cilën ne derdhim djers e mund, jo vetem që është duke i kundershtuar kërkesat tona në gjykatë për pagesen e kontributeve pensionale, por edhe është duke kërkuar nga gjykata që e njejta të na obligoj neve si palë në procedurë që ti paguajm të gjitha shpenzimet gjyqesore!!!”, thuhet tutje në njoftim.
Sindikata i kë bërë thirrje menaxhmentit të “Trepçës” që menjëherë nga ky muaj të fillojë pagesën mujore të trustit pensional dhe urgjentisht të hapë dialog me Sindikatën dhe përfaqësuesit e minatorëve për një marrëveshje të drejtë dhe të qëndrueshme.
“Ndërsa nga gjykata kërkojmë mbrojtje ligjore dhe njëherit të na e lejoj të drejten tonë për qasje në gjykatë, si e drejt bazike për shqyrtimin e kërkesave tona në rrugë gjyqësore! Në të kundërtën, Sindikata e Minatorëve do të ndërmarrë hapat e nevojshëm sindikal për mbrojtjen e të drejtave tuaja”,ka deklaruar sindikata.
