Presidentja Vjosa Osmani u prit sot në takim nga presidentja e Sllovenisë Natasha Pirc Musar në Lubjanë.
Ajo tha se kishte një diskutim të përzemërt me miken e Kosovës.
“Mirënjohja e popullit të Kosovës është e thellë për mbështetjen e Sllovenisë për të ardhmen euroatlantike të vendit tonë”, tha Osmani në një postim në Facebook.
Osmani po merr pjesë në Asamblenë Parlamentare të NATO-s në Lubjanë, si e ftuar speciale nga presidenti Marcos Perestrello.
Ajo do të merr pjesë në pritjen zyrtare të organizuar për nder të sesionit të Asamblesë Parlamentare nga kryetarja e Asamblesë Kombëtare të Sllovenisë, Urshka Klakoçar Zupanqiq. Po ashtu, do të zhvillojë edhe takime të tjera gjatë sesionit të Asamblesë Parlamentare të NATO-s.
Kujtojmë, e para e vendit tonë u nderua sot me Çmimin e Asamblesë Parlamentare të NATO-s për Gratë, Paqen dhe Sigurinë. Ajo tha se këtë vlerësim të jashtëzakonshëm ia dedikon grave të Kosovës.
