Presidentja Vjosa Osmani ka mbajtur fjalimin kryesor në emër të Kosovës, në ceremoninë zyrtare të Ditës së Kosovës në EXPO 2025, në Osaka të Japonisë.
Në fjalimin e saj, presidentja Osmani tha se nesër është Dita e Çlirimit në Kosovë – dita kur populli shqiptar u lirua përfundimisht nga regjimi gjenocidal i Serbisë, raporton KosovaPress.
“Një ditë që nderon guximin e atyre që luftuan për lirinë tonë, kujtimin e atyre që dhanë sakrificën më të madhe dhe fuqinë e aleancave që na ndihmuan kur kishim më së shumti nevojë. Sot, Kosova është një demokraci që shikon drejt të ardhmes, e udhëhequr nga sundimi i ligjit, me një brez të ri vizionar dhe e përkushtuar thellësisht ndaj vlerave euro-atlantike,” tha Osmani
Duke folur për raportet me Japoninë, presidentja tha mbështetja e vazhdueshme e Tokios zyrtare për popullin e Kosovës sidomos pas luftës dhe gjatë fazave të ndryshme të rindërtimit, nuk do të harrohet kurrë.
“Ndërsa Kosova vazhdon rrugën e zhvillimit dhe forcimit të pozitës së saj ndërkombëtare, presim me padurim thellimin e mëtutjeshëm të këtij partneriteti,” tha Osmani.
E para e vendit tonë ndodhet për vizitë zyrtare në Japoni nga data 10 deri më 15 qershor, me qëllim të thellimit të bashkëpunimit ndërmjet dy shteteve mike.
