Dialogu i ndërmjetësuar nga BE-ja mbetet kyç për normalizimin e marrëdhënieve midis Kosovës dhe Serbisë e filloi fjalimin e tij, Përfaqësuesi i Francës në OKB, Jérôme Bonnafont në seancën e Këshillit të Sigurimit të OKB-së që po mbahet sot.
Ai tha se e përbashkëta e Kosovës dhe Serbisë është e ardhmja evropiane në një mjedis paqeje dhe prosperiteti.
Bonnafont: Rruga drejt integrimit të vendeve është komplekse
“Rruga drejt integrimit të vendeve është komplekse, por është në dobi të të dy popujve. Çështja është ndërtimi i shteteve që kalojnë plagët e së kaluarës dhe konsolidojnë demokracinë plurale. Ne u bëjmë thirrje të dyja palëve që të vazhdojnë rrugën drejt normalizimit të marrëdhënieve, të mbështetur nga dialogu i lehtësuar prej BE-së, i cili demonstron relevancën dhe efektshmërinë e tij”, tha ai.
Përfaqësuesi i Francës e përgëzoi përparimin e fundit në dialogun Kosovë-Serbi si dhe miratimin e Ligjit për të Huajt në Kosovë.
Bonnafont: Do të mbetemi të vëmendshëm për të siguruar zbatimin e Ligjit për të Huajt
“E përgëzoj edhe zbatimin e Ligjit për të Huajt, që është arritur përmes një konsultimi me BE-në. Do të mbetemi të vëmendshëm për të siguruar zbatimin e tij të plotë, që duhet të garantohet me përfaqësuesin e BE-së dhe duke angazhuar përfaqësuesit e Serbisë në Kosovë”, u shpreh ai.
Ai nënvizoi rëndësinë e zbatimit të Marrëveshjes së Brukselit dhe asaj të Ohrit, si bazë për avancimin e marrëdhënieve dhe kërkoi që OKB-ja dhe UNMIK-u të luajnë rol aktiv në këtë proces.
Bonnafont tha se rivendosja e pjesëmarrjes aktive serbe në qeverisjen lokale dhe në përgjithësi në institucionet e Kosovës mbetet qenësore.
Në lidhje me sulmin në Banjskë, Franca kërkoi që përgjegjësit të dalin para drejtësisë.
Ai konfirmoi mbështetjen për UNMIK-un, KFOR-in dhe EULEX-in, duke theksuar angazhimin për paqe afatgjatë dhe pajtim mes Kosovës dhe Serbisë.
Bonnafont: Franca siguron mbështetje të plotë për paqe afatgjatë dhe pajtim mes të dyja shteteve
“Franca vazhdon të mbështesë përpjekjet e UNMIK-ut në koordinim me KFOR-in dhe misionin e EULEX-it. Mandati i UNMIK-ut është i pandashëm dhe i ndërlidhur me marrëdhëniet mes Kosovës dhe Serbisë. Franca mbështet të gjitha përpjekjet logjike për harmonizimin e misionit me masat e efektivitetit, në përputhje me mandatin e vet të plotë. Franca siguron mbështetje të plotë për paqe afatgjatë dhe pajtim mes të dyja shteteve”, tha ai.
Bonnafont shtoi se Franca ka gatishmërinë për të qëndruar e angazhuar në procesin e dialogut, duke ofruar mbështetje institucionale dhe ndërkombëtare për të siguruar stabilitet, drejtësi dhe bashkëpunim afatgjatë midis Kosovës dhe Serbisë.
