Policia e Kosovës ka parandaluar futjen e mallrave të kontrabanduara në dy raste të ndara më 13 gusht, në territorin e Republikës së Kosovës.
Në rastin e parë, njësia Task Forcë (DRPK-Lindje dhe Dogana), ka ndaluar një automjet në rrugën Pozhoran–Sllatinë–Viti, i cili dyshohet se kishte hyrë nga Maqedonia e Veriut drejt Kosovës me mallra pa dokumentacion doganor.
Në automjet u gjetën:
3,000 copë produkte mishi të përpunuar (prodhim i Serbisë)
750 copë rrisk gjedhi (prodhim i Serbisë)
15,840 pako çokollata (prodhim i Serbisë)
Në rastin e dytë, në rrugën Viti–Gerlicë, policia kufitare ka ndaluar një automjet tjetër të dyshuar, ku u zbuluan sasi të mëdha farash të bardha e të zeza të paketuara në thasë.
Në vijim të kontrollit, në një depo të lidhur me të dyshuarin u gjet sasi shtesë e mallrave, gjithashtu pa dokumentacion.
Sipas vlerësimeve të tregut, vlera e përgjithshme e mallrave të sekuestruara në të dy rastet kalon 20,000 euro, ndërsa shmangia e detyrimeve doganore llogaritet mbi 5,000 euro.
Mallrat janë sekuestruar nga Dogana e Kosovës për procedura të mëtejshme.
