Ish-deputeti i Partisë Socialiste Hamit Kosta, një figurë e njohur e jetës politike dhe publike në zonën e Peqinit, është ndarë nga jeta në moshën 70-vjeçare.
Lajmin e hidhur e ka konfirmuar familja e Kostës, i cili prej më shumë se një dekade ishte tërhequr nga angazhimet publike.
“Me dhimbje të thellë njoftojmë ndarjen nga jeta të xhaxhait tonë të dashur Hamit Kosta. Ai do të kujtohet gjithmonë për mirësinë, urtësinë dhe dashurinë që na dhuroi. Varrimi bëhet nesër në orën 14:00”, njofton familja.Hamit Kosta ka shërbyer si deputet i Partisë Socialiste, duke kontribuar në përfaqësimin e qytetarëve dhe në zhvillimin e zonës që përfaqësonte.
Gjatë karrierës së tij, ai u vlerësua për përkushtimin, thjeshtësinë dhe lidhjen e fortë me komunitetin. Mirëpo, pas tërheqjes nga politike, ai u përfshi rreth 9 vite më parë në një konflikt me ish-bashkëjetuesen.
Në vitin 2017, Hamit Kosta kërcënoi armë zjarri ish-bashkëjetuesen. Gjatë kontrollit, atij iu gjet arma e zjarrit me disa fishekë në krehër dhe u arrestua menjëherë.
Hamit Kosta ka qenë deputet i legjislaturës 2005-2009. Ai ishte pjesë e grupit të deputetëve të përjashtuar nga PS-ja, pasi votuan për zgjedhjen e Bamir Topit president.
Për këtë arsye, Kosta u largua nga PS-ja dhe iu bashkua asokohe PDK-së së drejtuar nga Nard Ndoka, që ishte pjesë e koalicionit të qeverisë së drejtuar nga ish-Kryeministri Sali Berisha. Më parë, Kosta ka mbajtur edhe detyrën e drejtorit të Burgut të Sigurisë së Lartë në Peqin.
