Tre persona u plagosën të enjten në një seri sulmesh ajrore izraelite që synonin disa zona në Libanin jugor, sipas mediave lokale.
Një dron izraelit goditi shtëpinë e një bariu në qytetin kufitar Shebaa, duke shkaktuar lëndime, raportoi agjencia shtetërore e lajmeve NNA, pa specifikuar numrin e të lënduarve. Megjithatë, një gazetar i Anadolu tha se dy persona u plagosën në sulm.
Një person i tretë u plagos kur një dron qëlloi një raketë në qytetin jugor të Haroufit, tha NNA.
Kurse, mediat lokale kanë raportuar se presidenti libanez Joseph Aoun urdhëroi ushtrinë e tij të enjten të kundërshtojë çdo ndërhyrje izraelite në zonat e çliruara në jug, në masën e parë të tillë që kur një armëpushim hyri në fuqi në fund të vitit 2024.
Urdhri erdhi pasi forcat e ushtrisë izraelite bastisën një ndërtesë komune në qytetin Blida në Libanin jugor mbrëmë, duke vrarë një zyrtar publik.
Agjencia shtetërore e lajmeve NNA raportoi se presidenti libanez e dënoi sulmin izraelit, duke e quajtur atë “pjesë të një modeli të vazhdueshëm të agresionit izraelit”.
Gjatë një takimi me Komandantin e Ushtrisë, Gjeneral Rudolph Haykal në Pallatin Baabda në Bejrut, Aoun tha se sulmi u organizua një ditë pas një takimi nga komiteti mbikëqyrës i armëpushimit, “i cili nuk duhet të kufizohet vetëm në regjistrimin e incidenteve, por të veprojë për t’i dhënë fund atyre duke i bërë presion Izraelit që të respektojë marrëveshjen e armëpushimit të nëntorit dhe të ndërpresë shkeljet e sovranitetit libanez”.
Ushtria izraelite pretendoi se ndërtesa e komunës Blida është përdorur kohët e fundit për aktivitete të Hezbollahut nën mbulesën e infrastrukturës civile.
Hezbollahu, nga ana e tij, dënoi sulmin izraelit dhe përshëndeti vendimin e Aounit, duke premtuar mbështetje për ushtrinë për të rritur aftësitë e saj mbrojtëse.
