Me qindra qytetarë nga gjitha trevat shqiptare edhe sot bën homazhe në Kompleksin Memorial në Reçak.
Në 27 vjetorin e masakrës, ku u vranë mizorisht gra e burra të këtij fshati, qytetarët kanë kujtuar 15 janarin e vitit 1999.
Habib Veseli nga Reçaku, tregon se si i kishte parë të gjitha kufomat në xhaminë e fshatit, pas vrasjes dhe masakrimit të tyre.
“Nuk kishe se çfarë të bëje, toka poshtë e qielli lartë, nuk ki çfarë të bësh. Vështirë boll, unë për vete nuk kom viktima, por shtëpinë e kam të kallur… të mjerët ata, po lutem këta perëndia në shpirt të tyre… unë vi këtu hiç pa ditë, vi nganjëherë në mal shëtis, vi këtu i këndoj tre Kulvallaha për shpirt të tyre e Zoti këta i shpërblen”, thotë ai.
Hajredin Haziri i cili jeton nga Zvicra, thotë se gjitha familjet në Reçak të cilët kanë humbur më të dashurit e tyre duhet të gëzojnë respekt të veçantë nga institucionet.
Haziri: Familjarët e masakrës së Reçakut duhet të kenë respekt instituciuonal
“Për anëtarët e familjes çka kanë jetuar duhet me pas respekt, disa gjëra, disa tolerime, jo shembull veç sot vijmë dhe më i shohim në rrugë dhe nuk i përshëndesim. Ato nëna, e ato duhet të kenë respekt të veçantë nga institucionet”, tha ai.
Edhe Mexhide Luboshtani e cila ka shumë familjarë nga fshati Reçak, kujton ditën e 15 janarit të vitit 1999.
Luboshtani: Ajo ditë ka qenë një tmerr
“Ditën e 15 janarit e kujtoj, mos u kthefshim kurrë në atë kohë. Asnjë popull i botës. Ne kemi pasur një vdekje, nënës time i ka vdekur axha dhe kur ka ardhur daja për varrim, i kanë thënë kthehu se në Reçak është bërë një krim jashtëzakonisht i madh dhe varroseni aty ku ka vdekur e atë ditë që ka vdek janë mbytur dy dhëndërrit, ajo ditë ka qenë një tmerr që tezet e mia, gratë e atyre dy burrave që kanë qenë të martuara për dy vëllezërit nuk mundeshin assesi me i bind që janë mbytur burrat e tyre sepse të tria e kanë pasur nga një djalë ushtar”, përfundon ajo.
Në 27 vjetorin e kësaj masakre, në Kompleksin Memorail në Reçak kanë bërë homazhe krerët e shtetit, krerë të partive politike e diplomatë të huaj.
Edhe këtë vit, në Reçak erdhi ai që i tha botës se aty ishte kryer krim kundër njerëzimit -ish shefi i atëhershmen i Misionit Verifikues të OSBE-së, William Walker.
Më 15 janar të vitit 1999 forcat serbe vranë mizorisht 45 civilë shqiptarë në fshatin Reçak të komunës së Shtimes.
Ngjarja e rëndë në Reçak nxiti reagimin e ndërkombëtarëve ku NATO vendosi të sulmoi caqet ushtarake policore serbe.
