Administrata e presidentit amerikan, Donald Trump, ka vendosur sanksione të reja ndaj Gjykatës Penale Ndërkombëtare (GJPN), duke paralajmëruar masa që synojnë kufizimin e funksionimit të këtij institucioni ndërkombëtar të drejtësisë.
Vendimi u bë publik të premten dhe shënon një përshkallëzim të presionit të Uashingtonit ndaj gjykatës, e cila ka qenë në shënjestër të administratës Trump për shkak të hetimeve dhe procedurave kundër zyrtarëve amerikanë dhe izraelitë.
Sekretari amerikan i Shtetit, Marco Rubio, deklaroi se presidenti Trump nuk do të lejojë që Gjykata Penale Ndërkombëtare të ndjekë penalisht shtetasit amerikanë.
“Do t’i ndalojmë transaksionet me këtë gjykatë që vepron jashtë rregullave, do t’ia heqim burimet dhe do ta paralizojmë aftësinë e saj për të funksionuar”, deklaroi Rubio.
Sanksionet e reja mund të prekin jo vetëm zyrtarët e gjykatës, por edhe kompanitë që ofrojnë shërbime për të, duke përfshirë shërbimet financiare, sigurimet dhe teknologjinë, shkruan reuters.
Nga ana tjetër, zëvendësprokurorja e Gjykatës Penale Ndërkombëtare, Nazhat Shameem Khan, i dënoi masat amerikane, duke thënë se ato synojnë të minojnë sundimin e ligjit ndërkombëtar dhe pavarësinë e një institucioni gjyqësor.
Ajo theksoi se gjykata do të vazhdojë punën në të gjitha çështjet, hetimet dhe procedurat penale, pavarësisht presionit.
Përplasjet mes Uashingtonit dhe gjykatës janë intensifikuar pas lëshimit të fletarrestimeve ndaj kryeministrit izraelit, Benjamin Netanyahu, dhe ish-ministrit të Mbrojtjes, Yoav Gallant, lidhur me dyshimet për krime lufte dhe krime kundër njerëzimit në Rripin e Gazës.
SHBA-ja gjithashtu ka kundërshtuar hetimet e mëparshme të gjykatës për veprimet e pjesëtarëve të ushtrisë amerikane në Afganistan.
Gjykata Penale Ndërkombëtare, e themeluar më 2002, ka mandat për të ndjekur penalisht personat përgjegjës për gjenocid, krime lufte dhe krime kundër njerëzimit. Shtetet e Bashkuara nuk janë anëtare të saj.
Ndërkohë, institucioni po shqyrton masa për të zvogëluar ndikimin e sanksioneve, përfshirë ndryshimin e disa shërbimeve teknologjike dhe sigurimin e alternativave për shërbimet bankare.
Përplasja e fundit ngre shqetësime për ndikimin e presionit politik mbi drejtësinë ndërkombëtare dhe aftësinë e institucioneve gjyqësore për të vepruar në mënyrë të pavarur.
