Rasti i trupit të karbonizuar të një 48-vjeçari në Pieria të Greqisë po shndërrohet në një thriller.
Autoritetet po hetojnë seriozisht mundësinë e një aktiviteti kriminal pas gjetjeve të ekspertizës mjeko-ligjore. Fermeri u gjet i vdekur brenda automjetit të tij bujqësor, në zonën e Sfendamit mëngjesin e së premtes së kaluar, më 6 shkurt. Shërbimi i Zjarrfikësve u njoftua nga një burrë, i cili e gjeti viktimën në sediljen e pasagjerit.
Sipas informacioneve, 48-vjeçari ishte gjallë kur shpërtheu zjarri në automjetin e tij. Detaji i çuditshme në lidhje me këtë rast është se u zbulua se atij i mungonin dhëmbët e përparmë. Përveç dhëmbëve, ka shkaktuar shqetësim fakti që burrit i mungonte edhe një pjesë e qafës.
“Kjo është kocka hioide, e cila është e vështirë për t’u hequr, por edhe për t’u djegur. Në të njëjtën kohë, një mjek ligjor vuri re një gjetje të çuditshme në kokë, një infiltrat hemorragjik. Ka të ngjarë që kjo të jetë shkaktuar nga një goditje”, informon media greke.
Për më tepër, në barkun e viktimës u gjet një lëng i verdhë dhe pa erë, i cili u dërgua për analiza toksikologjike. Vlen të përmendet se para se të ndërronte jetë, fermeri kishte vizituar një pikë karburanti dhe kishte blerë dy bidona me benzinë për punë bujqësore. Këto bidona nuk u gjetën të paprekura në vendin e tragjedisë, vetëm kapakët e tyre.
Prandaj, bazuar në të dhënat e mësipërme, ky nuk është një aksident dhe hetimet janë duke vazhduar.
