Një operacion për neutralizimin e një droni u zhvillua mëngjesin e së shtunës mbi Aeroportin Ndërkombëtar të Dubait në Emiratet e Bashkuara Arabe, duke shkaktuar alarm tek autoritetet dhe pezullim të përkohshëm të fluturimeve.
Sipas një dëshmitari okular që foli për Agence France-Presse (AFP), u dëgjua një shpërthim i fortë dhe menjëherë pas tij u pa një re tymi që u ngrit në qiell pranë aeroportit. Ministria e Mbrojtjes e Emirateve të Bashkuara Arabe njoftoi se është në zhvillim një operacion për përballimin e një sulmi me dron, i cili i atribuohet Iran.
Qeveria e Dubait konfirmoi incidentin përmes një postimi në platformën X duke bërë të ditur se ndodhi një “incident i vogël që rezultoi në rënien e disa fragmenteve pas një ndërhyrjeje të suksesshme”. Autoritetet sqaruan se nuk ka pasur të lënduar dhe as dëme në infrastrukturat kritike.
Ndërkohë, autoritetet hodhën poshtë informacionet që qarkullojnë në rrjetet sociale për një goditje më të rëndë ndaj aeroportit ndërkombëtar të qytetit, duke theksuar se situata është nën kontroll dhe se po merren të gjitha masat e nevojshme të sigurisë.
Në një deklaratë, administrata e aeroportit theksoi se “për arsye sigurie të pasagjerëve, stafit të aeroportit dhe ekuipazheve të linjave ajrore, operacionet në Dubai International Airport (DXB) janë pezulluar përkohësisht”.
Sipas autoriteteve, të gjitha procedurat për menaxhimin e incidentit po kryhen në përputhje me protokollet e parashikuara të sigurisë.
Ngjarjandodh në një kohë tensionesh të rritura në Lindjen e Mesme, ndërsa autoritetet e Emiratet e Bashkuara Arabe mbeten në gatishmëri për kërcënime të mundshme të reja.
