Dy persona kanë mbetur të lënduar gjatë protestës që vijon në Rrjoll në ditën e 25-të.
Sipas videove të dërguara nga banorët e zonës, lëndimet kanë ndodhur pas tensioneve dhe shtyrjeve me forcat e policisë, kur banorët tentuan të hynin në kantierin ku po kryhen punimet për ndërtimin e resortit.
Banorët shprehen të shqetësuar për përplasjet dhe kërkojnë ndërprerjen e punimeve deri në gjetjen e një zgjidhjeje për konfliktin mbi ndërtimin e resortit. Policia nuk ka dhënë ende një njoftim zyrtar për incidentin.
Prej një muaji, banorët e Rrjollit protestojnë kundër ndërtimit të resortit luksoz “Blue Borgo” nga botuesi dhe ndërtuesi Bashkim Ulaj, duke pretenduar se projekti po zhvillohet mbi tokat e tyre. Përplasjet mes banorëve dhe policisë janë shtuar dita-ditës, ndërsa ata përpiqen të bllokojnë punimet e kompanisë “Gener 2”. Dy qytetarë janë lënduar dhe dërguar në spital, ndërsa banorët shprehen të vendosur për të mos hequr dorë nga prona e tyre.
Një fitore e pjesshme gjyqësore i është njohur familjes Malaj, e cila ka marrë pronësinë mbi 2,1 hektarë tokë në zonën e Rrjollit, duke shpresuar se kjo do të ndikojë pozitivisht edhe për pjesën tjetër të tokës ku po ndërtohet resorti. Punimet për projektin “Blue Borgo”, që shtrihet mbi 146 hektarë, parashikojnë 33 struktura akomoduese dhe shërbimi, ndërsa investitori strategjik është shoqëria “ABA Blue Borgo”.
