Forcat ukrainase kanë kryer sulme ndaj dy rafinerive ruse të naftës, në Omsk dhe Ukhta, ka njoftuar të premten presidenti i Ukrainës, Volodymyr Zelensky.
Sulmet vijnë një ditë pas bombardimeve ruse në rajonin e Donetskut, ku, sipas raportimeve të autoriteteve ukrainase, humbën jetën 35 persona.
Përmes një deklarate në rrjetin social X, Zelensky bëri të ditur se një nga objektivat ishte rafineria në Ukhta, e cila ndodhet rreth 1.900 kilometra larg kufirit të Ukrainës, si dhe një rafineri e rëndësishme në Omsk.
Sipas presidentit ukrainas, për sulmin ndaj objektivit në Ukhta janë përdorur dronë An-196 RS, me rreze veprimi prej rreth 2.500 kilometrash, ndërsa ndaj rafinerisë në Omsk janë përdorur dronë FP-6, modele të modifikuara të dronëve FP-1.
“Ne vazhdojmë t’u përgjigjemi sulmeve ruse ndaj Ukrainës dhe e bëjmë këtë me saktësi të lartë”, ka deklaruar Zelensky, duke shtuar se është goditur edhe një qendër tjetër të dhënash.
Ndërkohë, më 8 tetor, sulmet ruse në rajonin e Donetskut shkaktuan viktima të shumta. Sipas raportimeve, 32 persona u vranë në Kramatorsk, ndërsa tre të tjerë në Bilenke.
Pas sulmeve, transporti publik në qytet u pezullua përkohësisht, ndërsa ekipet e emergjencës zhvillonin operacionet e kërkim-shpëtimit.
