![](https://i0.wp.com/www.fiks.al/wp-content/uploads/2023/09/deshmitari-i-22-te-i-thote-avokatit-te-veselit-se-nuk-shkuan-te-liqeni-i-radoniqit-per-te-bere-hetime-por-u-bazuan-ne-burimet-serbe_64f8a7557ef1a.jpeg?resize=850%2C485&ssl=1)
Avokati i Kadri Veselit, Ben Emmerson, e ka marrë në pyetje sot dëshmitarin e 22-të të Zyrës së Prokurorisë së Specializuar të Kosovës në Gjykatën Speciale, Frederick Abrahams, i cili edhe sot ka vazhduar dëshminë e tij në Hagë.
Nga pyetjet e Emmersonit, dëshmitari në fjalë i ka pranuar gabimet e tij.
Gjatë marrjes në pyetje, ai ka pranuar se informatat i ka pasur nga burimet serbe dhe nuk i kishte hetuar e konfirmuar në mënyrë të pavarur.
Kur Emmerson e pyeti se pretendimet e tij a i kishte marrë nga pala serbe, përgjigjja e Abrahams ishte “Po”.
“S’kemi bërë hetime në tërësi. E kam përmendur këtë, por nuk është reflektuar në mënyrë të saktë. Ne asnjëherë nuk e kemi prezantuar rastin e Gllogjanit në Liqenin e Radoniqit”, ka thënë dëshmitari.
Më pas, avokati e ka pyetur nëse dëshmitari ka shkuar në vendngjarje.
“Ne shkuam në vendin e krimit. U përpoqëm që të shkonim në Liqen…Në atë pikë që shkuam ne trupat ishin larguar dhe po mbaheshin në një hotel në një morg të sajuar dhe ne nuk u lejua që të shkuam në hotel”, ka thënë dëshmitari.
“Por ju nuk shkuat tek Liqeni?, ishte pyetja e radhës e avokatit Emmerson.
“Jo nuk shkuam atje. Shkuam te morgu i improvizuar”, është përgjigjur dëshmitari.