Është konfirmuar rasti i parë me Virusin e Nilit Perëndimor (WNV) në Shqipëri për vitin 2026.
Ministria e Shëndetësisë bën me dije se rasti është evidentuar gjatë dhjetëditëshit të dytë të muajit gusht në qarkun e Korçës.
Sipas Ministrisë, që prej fillimit të vitit janë testuar 30 mostra nga raste të dyshuara për infeksion me Virusin e Nilit Perëndimor, të cilat kanë rezultuar negative. Rasti i evidentuar në gusht është i pari i konfirmuar në vend për këtë vit.
Pas konfirmimit, Instituti i Shëndetit Publik (ISHP) ka vijuar survejancën epidemiologjike në njerëz, hetimin epidemiologjik dhe entomologjik të rastit, si dhe monitorimin e situatës në vend.
Virusi i Nilit Perëndimor transmetohet kryesisht përmes pickimit të mushkonjave të infektuara dhe është evidentuar edhe në Shqipëri gjatë viteve të mëparshme.
Të dhënat e Ministrisë së Shëndetësisë tregojnë se në vitin 2024 u raportuan 107 raste të konfirmuara dhe 50 raste të mundshme, ndërsa në vitin 2025 u regjistruan dy raste të konfirmuara.
Autoritetet shëndetësore vijojnë monitorimin e situatës dhe survejancën për evidentimin në kohë të rasteve të reja.
