![](https://i0.wp.com/www.fiks.al/wp-content/uploads/2023/06/kryetari-i-keshillit-kombetar-ne-lugine-reagon-pas-arrestimit-te-ismailit-serbia-sdeshiron-paqe_648396642ae9c.png?resize=850%2C466&ssl=1)
Kryetari i Këshillit Kombëtar të Shqiptarëve në Luginë, Nevzad Lutfiu, ka thënë se drejtori i Shtëpisë së Kulturës në Bujanoc, pas arrestimit nga Policia e Serbisë, po mbahet në stacion policor.
Ai tha se sipas familjarëve, ai është marrë në stacionin policor për tu intervistuar rreth shfaqjes së një filmi të metrazhit të shkurtër, i cili është mbështetur nga Qeveria e Kosovës përmes Këshillit Kombëtar Shqiptar.
“Ky presion dhe këto metoda ndaj shqiptarëve po dëshmojnë se Serbia nuk e dëshiron paqen dhe të ardhmen në Ballkan. Skenarët me presione të tilla ndaj institucioneve dhe ndaj shqiptarëve janë të papranueshme dhe ftojmë të gjithë faktorët kombëtarë e ndërkombëtar që të dënojnë këtë veprim të policisë serbe sidomos ndaj rasteve të tilla e sidomos ndaj rastit të sotshëm”, tha Lutfiu.
Kujtojmë se në lidhje me ngjarjen ka reaguar edhe Blerim Vela, shefi i stafit të presidentes së vendit, Vjosa Osmani, ku tha se ky është një represion i egër nga regjimi i presidentit serb, Aleksandar Vuçiq.