Zëri i viktimave të dhunës seksuale u dëgjua edhe në Uashington. Kosova ka qenë i vetmi vend që në takimin e pestë të nivelit të lartë për agjendën për gratë, paqen dhe sigurinë, ka folur për sfidat, me të cilat ballafaqohen gratë dhe vajzat e dhunuara seksualisht gjatë luftës së fundit në Kosovë. Drejtoresha e Qendrës Kosovare për Rehabilitimin e të Mbijetuarve të Torturës, Feride Rushiti tregon se në fjalimin e saj ka përmendur tensionet në veri dhe traumat e shkaktuara tek kjo kategori e prekur nga lufta.
Udhëheqësja e kësaj qendre, si folëse nga Kosova, deklaron se ka ndarë praktikat e Kosovës në fuqizimin e të mbijetuarve dhe luftimin e stigmës.
Rushiti: Kam adresuar çështjet me të cilat ballafaqohen viktimat e dhunës seksuale në Kosovë
“Pata nderin që të jam folësja e vetme në ‘State Department’ si mysafire e nderit, që në hyrje të këtij samiti, ku ishte një emocion i veçantë, sepse vite më parë, pikërisht në atë podium, puna dhe veprimtarie me viktimat e dhunës seksuale është njohur përmes një çmimi ndërkombëtar siç është ‘gratë e guximshme’. Aty pata mundësi që të adresojë çështjet, me të cilat ballafaqohen viktimat e dhunës seksuale në Kosovë, të arriturat, sfidat por edhe përvojat e nxjerra nga puna jonë 25-vjeçare dhe ndarja e këtyre përvojave me vende të ndryshme të cilat ballafaqohen me këtë lloj krimi, siç ishte Ukraina, Afganistani dhe vendet tjera, në të cilat dhuna seksuale vazhdon të jetë pjesë e integruar e luftës dhe mjet i luftës”, deklaron ajo.
Rushiti, gjatë një interviste për Kp potencon se në këtë ngjarje, e cila është zhvilluar gjatë tërë javës së kaluar, ka theksuar edhe vështirësitë e vajzave dhe grave të dhunuara seksualisht nga kriminelët serbë.
Rushiti: Sfidat e të mbijetuarve të dhunës seksuale janë stigma dhe dokumentimi
“Sfidat e të mbijetuarve të dhunës seksuale, jo vetëm në Kosovë por edhe çdo kund, natyrisht që janë stigma dhe ballafaqimi me këtë krim. Pastaj dokumentimi, shërbimet psiko-sociale, njohja e tyre ligjore. Por, për dallim nga vendet tjera, të cilat ende ballafaqohen me pasoja, mendoj që Kosova në këtë forum ndërkombëtar, arriti të ndajë përvojën e mirë që është arritur deri më sot dhe sfidat me të cilat ballafaqohen ende gratë dhe vajzat e Kosovës që kanë përjetuar këtë krim”, shton ajo.
Teksa në veri vazhdojnë tensionet nga protestuesit serbë, Rushiti thotë se ka përmendur edhe ri-traumatizimin e kësaj kategorie.
Rushiti: Tensionet në veri vazhdojnë të prodhojnë trauma për këtë grup të afektuar nga lufta
“Kur flasim për çështjet e sigurisë, pjesë të fjalimit tim e kam pasur edhe relacionin, apo tensionin e krijuar në pjesën veriore të Kosovës. Pa diskutim që kjo vazhdon të prodhojë trauma dhe destabilitet për grupin që është i afektuar nga lufta. Dhe në këtë perspektivë jam munduar të adresojë krejt tensionin, me të cilin po ballafaqohet shteti ynë i Kosovës”, thekson Rushiti.
Takimi i nivelit të lartë për agjendën për gratë, paqen dhe sigurinë është organizuar nga Departamentit të Shtetit Amerikan dhe Ambasada e Rumanisë.
Rushiti: Udhëheqës të kësaj ngjarje janë Departamenti i Shtetit Amerikan dhe Ambasada e Rumanisë
“Që nga vitit 2016, kanë filluar të mbahen forume të ndryshme ku është krijuar edhe një network për gratë, paqen dhe sigurinë dhe kësaj radhe udhëheqës dhe nikoqir i këtij event-i është Departamenti i Shtetit Amerikan dhe Ambasada e Rumanisë. Me qëllim që gruan, paqen dhe sigurinë të vendos me theks të veçantë, shtetet përfaqësuese, por edhe shoqëria civile arrin të adresojë nevojat dhe sfidat me të cilat ballafaqohen gratë, qoftë nga rajonet që vijnë, qoftë nga zonat e konfliktit dhe paqes dhe është një takim i cili vendos në theks të veçantë promovimin e të drejtave të grave, qoftë në vendimmarrje, qoftë në siguri, por edhe në ballafaqimin e krimeve të luftës, siç është dhuna seksuale në këtë rast”, thotë Rushiti.
Rreth 20 mijë gra e burra nga Kosova janë dhunuar seksualisht gjatë luftës së fundit në Kosovë. Për këtë krim, gjykatat vendore kanë dënuar vetëm një person me dhjetë vjet burgim.
Ndryshe, Kosova me iniciativë të presidentes Vjosa Osmani, këtë vit do të organizojë për herë të dytë forumin ndërkombëtar për Gratë, Paqen dhe Sigurinë.
