Izraeli akuzoi të hënën Holandën se është bërë një “vatër e nxehtë antisemitizmi”, pasi autoritetet e qytetit të Alkmaarit mbështetën ndalimin e tifozëve të klubit izraelit Hapoel Be’er Sheva në ndeshjen e Europa League kundër AZ Alkmaar, më 15 tetor.
Autoritetet lokale e klasifikuan ndeshjen si rrezik shumë të lartë për shkak të shqetësimeve për protesta dhe përplasje të mundshme.
Ministria e Jashtme izraelite e kritikoi vendimin, duke pretenduar se ai “shpërblen ata që kërcënojnë dhe nxisin dhunë” dhe akuzoi autoritetet holandeze për ndalimin e “viktimave, jo sulmuesve”, duke iu referuar përleshjeve në Amsterdam në nëntor 2024.
Izraeli pretendoi gjithashtu se retorika anti-Izrael nga politikanë dhe figura publike holandeze po nxiste sulmet antisemite. Nuk pati reagim të menjëhershëm nga autoritetet holandeze, shkruan Anadolu.
Mosmarrëveshja vjen mes tensioneve të vazhdueshme lidhur me pjesëmarrjen e Izraelit në aktivitete sportive dhe kulturore, pasi transmetuesi holandez AVROTROS njoftoi bojkotimin e Eurovision 2027 për shkak të përfshirjes së Izraelit në luftën në Gaza.
