Analisti politik Skënder Zogaj i cilëson zgjedhjet e reja të 7 qershorit si të ndërlikuara dhe, në njëfarë mënyre, edhe absurde për rrethanat në të cilat po mbahen në Kosovë.
“Zgjedhjet e reja të 7 qershorit janë komplekse, madje në njëfarë mënyre absurde, sepse po mbahen jashtë çdo standardi politiko-historik për Kosovën, e cila ende nuk e ka arritur shtetformimin e duhur dhe nuk e ka luksin të eksperimentojë me fatin e vet,” shprehet Zogaj.
Sipas tij, këto zgjedhje nuk po zhvillohen për interesa shtetërore, por si rezultat i përplasjeve politike.
Analisti politik Skënder Zogaj
“Zgjedhjet po ndodhin jo për shtetin, por për inatet e liderëve politikë dhe shtetërorë, si dhe të opozitës që është e dërmuar nga anakronizmat burokratike brendapartiake,” thekson ai.
Zogaj shton se, megjithëse nuk ishin të domosdoshme, partitë politike i kanë dëshiruar në heshtje këto zgjedhje.
“Të gjitha partitë e dinë se zgjedhjet e reja nuk ishin të nevojshme, por i dëshiruan me shpresën se mund të ndodhë ndonjë ‘mrekulli’, edhe në mënyrë të pamerituar,” deklaron ai.
Duke folur për rezultatin, ai vlerëson se gjithçka mbetet e hapur.
“A do të ketë ndryshime? Këtë askush nuk mund ta thotë me saktësi. Prandaj priten zhvillime të pazakonta, sepse gara zgjedhore mbetet e mbushur me pritje të paparashikueshme,” thotë Zogaj, duke shtuar se asnjë parti nuk është në pozicion të sigurt.
Sa i përket figurave politike, ai ndalet te Vjosa Osmani, për të cilën thotë se mbetet ndër më të diskutuarat.
“Ajo ka emër, por nuk ka një strukturë të konsoliduar partiake. Fati i saj do të varet jo nga individë të veçantë, por nga qëndrimi i kundërshtarëve të LVV-së dhe nga elektorati i LDK-së,” vlerëson ai.
Zogaj thekson se vendimtar në këto zgjedhje mund të jetë një kategori e veçantë votuesish.
“Gara këtë herë do të përcaktohet nga votuesit e heshtur, nga ata qytetarë që në zgjedhjet e kaluara nuk kanë marrë pjesë, por që tani mund të japin verdiktin e tyre,” shprehet ai, duke i inkurajuar ata të votojnë “për më të merituarit”.
Në fund, ai parashikon një garë të fortë mes partive kryesore opozitare.
“Gara më interesante pritet të zhvillohet ndërmjet LDK-së dhe PDK-së, ndërsa rol të rëndësishëm do të ketë edhe rezultati i AAK-së,” përfundon Zogaj.
