Ministri i mbrojtjes i Izraelit ka thënë se është i përkushtuar ndaj spastrimit etnik të Gazës përmes migrimit në shkallë të gjerë të palestinezëve, si pjesë e planeve afatgjata të Izraelit për territorin.
Israel Katz tha se qeveria do të zbatojë një plan që një numër i madh palestinezësh të largohen nga Gaza “në kohën dhe mënyrën e duhur”, në një deklaratë të mërkurën që shënon vrasjen e synuar të Mohammed Odeh, komandantit më të fundit ushtarak të Hamasit, shkruan Guardian.
Nxitja për largime masive shkel planin e armëpushimit të Donald Trump për Gazën , të cilin Izraeli e nënshkroi vitin e kaluar. Pika e dytë e planit thotë: “Gaza do të rindërtohet në dobi të popullit të Gazës, i cili ka vuajtur më shumë se sa duhet.”
Qeveria e Izraelit ka promovuar perspektivën e Gazës pa palestinezë që kur Trump sugjeroi në fillim të vitit të kaluar se qindra mijëra njerëz duhet të largohen për të “pastruar” Rripin e Gazës për rindërtim.
Vitin e kaluar, Izraeli ngriti një zyrë për “emigracion vullnetar” dhe lehtësoi kufizimet e udhëtimit për palestinezët që donin të bënin një udhëtim vajtje nga Rripi i Gazës.
Transferimi me forcë i popullatave civile është një krim lufte dhe një krim kundër njerëzimit. Zyrtarët izraelitë, përfshirë Katzin, përdorin termin “migrim vullnetar” për të përshkruar planet e tyre që një numër i madh palestinezësh të largohen nga Gaza.
Organizatat dhe avokatët e të drejtave të njeriut me seli në Izrael kanë paralajmëruar se kushtet që Izraeli i ka vendosur Gazës nënkuptojnë se asnjë largim nuk mund të konsiderohet vullnetar dhe se politika përbën planifikim për spastrim etnik.
