Deklarata e sotme e kryeministrit të Shqipërisë, Edi Rama, se “Serbia e humbi Kosovën”, ka nxitur reagime në rrjetet sociale.
Një nga reagimet vë në pikëpyetje vetë formulimin e përdorur nga Rama, duke theksuar se Kosova nuk mund të trajtohet si diçka që Serbia e kishte në pronësi dhe më pas e humbi.
“Sot Edi Rama shkroi se ‘Serbia e humbi Kosovën’. Jo, z. Rama. Serbia nuk humbi Kosovën siç humbet dikush një pronë të vetën. Serbia humbi kontrollin mbi një vend që e mbajti me dhunë, represion e krime. Kosova nuk u ‘humb’ nga Serbia – Kosova u çlirua”, thuhet në reagim.
Sipas këtij qëndrimi, dallimi në formulim nuk është vetëm çështje semantike, por lidhet edhe me mënyrën se si interpretohet historia politike e Kosovës dhe raporti i saj me Serbinë.
“Edhe fjalët kanë peshë, sidomos kur flitet për historinë tonë”, përfundon reagimi.
Në deklaratën e tij të sotme, Rama kishte theksuar se Serbia duhet ta pranojë realitetin e krijuar dhe kufijtë aktualë, duke deklaruar se Kosova është humbur përfundimisht për Beogradin.
