Kryeministri Albin Kurti ka bërë të ditur se ka pritur në takim të Dërguarin e Posaçëm të Bashkimit Evropian për dialogun Kosovë–Serbi, Peter Sørensen. Sipas tij, gjatë takimit u diskutua për ecurinë e procesit të dialogut, situatën në Ballkanin Perëndimor dhe zhvillime të tjera aktuale me interes të përbashkët.
Kurti theksoi se Kosova mbetet e përkushtuar ndaj zbatimit të Kushtetutës dhe ligjeve, duke garantuar barazinë e qytetarëve dhe përfaqësimin e të gjitha komuniteteve në institucionet shtetërore, përcjell “Bota sot”.
Ai shtoi se dorëheqjet kolektive të zyrtarëve serbë në veri katër vjet më parë kishin për synim, sipas tij, cenimin e karakterit shumetnik të institucioneve, ndërsa nënvizoi se sistemi gjyqësor duhet të ruajë shumetninë dhe njëkohësisht të garantojë pavarësinë e cilësinë e drejtësisë.
Postimi i plotë
Sot prita në zyrën time të Dërguarin e Posaçëm të Bashkimit Evropian për Dialogun Kosovë – Serbi, Peter Sørensen, me të cilin, mes tjerash, diskutuam për procesin që ai e ndërmjetëson, situatën në Ballkanin Perëndimor dhe tema aktuale.
Republika e Kosovës, përveçse afirmon, është këmbëngulëse në zbatimin e kushtetutshmërisë dhe ligjshmërisë, në barazinë e qytetarëve të saj dhe në gjithpërfshirje. Të punësuarit në institucionet e Republikës janë dhe duhet të jenë nga të gjitha komunitetet, e të karakterizohen nga kompetenca profesionale dhe integriteti etik, përfshirë këtu policinë, gjyqësorin e prokurorinë e shtetit.
Dorëheqjet kolektive të para katër vjetëve në veri të Mitrovicës kishin pikërisht synim rrënimin e përbërjes shumetnike të sistemit tonë demokratik. Tani, rruga përpara është ajo që e përcaktojnë Kushtetuta dhe ligjet e Kosovës, e cila në rastin e sistemit gjyqësor nënkupton ruajtjen e shumetnisë, por njëkohësisht edhe garantimin e pavarësisë dhe cilësisë së drejtësisë.
