Pesë persona janë arrestuar dhe gjashtë të tjerë janë shpallur në kërkim pas një ngjarjeje të rëndë të regjistruar këtë të enjte në Radhimë të Vlorës, ku biznesmeni Vasil Bedinaj ka denoncuar se është kërcënuar dhe dhunuar nga një grup personash.
Sipas Policisë së Vlorës, ngjarja ka nisur rreth orës 11:30, kur Bedinaj ka njoftuar uniformat blu se disa persona kishin shkuar në hotelin e tij dhe, nën kërcënimin e armëve dhe dhunës fizike, i kishin kërkuar 5 milionë euro.
Sipas dëshmisë së tij dhe veprimeve të para hetimore, biznesmeni është kërcënuar gjithashtu se duhej të largohej nga Shqipëria brenda 48 orëve.
Pas marrjes së njoftimit, Policia ka ngritur pika kontrolli në hyrje-daljet e Vlorës, në Dhërmi, si dhe në qarqet Fier e Gjirokastër.
“Range Rover”-i nuk ndalon në postbllok
Rreth orës 12:00, në një pikë kontrolli në Rrethin e Alikokës, një “Range Rover” i zi nuk i është bindur urdhrit të policisë për të ndaluar. Automjeti ka vijuar lëvizjen në drejtim të Peshkëpisë, ndërsa efektivët janë vënë në ndjekje.
Në zonën e Urës së Peshkëpisë, drejtuesi humbi kontrollin dhe automjeti doli nga rruga, duke përplasur barrierat mbrojtëse.
Në automjet ndodheshin Luan Muça, 55 vjeç, drejtues i mjetit, dhe vëllezërit Klaudio Lleshaj, 29 vjeç, dhe Mandrit Lleshaj, 33 vjeç, të dy punonjës të një shërbimi privat të sigurisë.
Muça dhe Mandrit Lleshaj mbetën të dëmtuar dhe u dërguan në Spitalin Rajonal të Vlorës. Sipas Policisë, ata ndodhen jashtë rrezikut për jetën.
Gjatë kontrollit të automjetit u gjet një pistoletë, së bashku me një karikator me 16 fishekë luftarakë.
Një tjetër automjet, me dëmtime nga të shtënat
Rreth orës 13:00, në një pikë kontrolli të ngritur nga Policia e Fierit, në Mbikalimin e Memorialit, u ndalua një tjetër automjet i shpallur në kërkim.
Në drejtimin e tij ishte shtetasi kosovar Blerim Heta, 40 vjeç.
Gjatë kontrollit, policia konstatoi dëmtime në xhamin e krahut të pasagjerit, që dyshohet se janë shkaktuar nga të shtënat me armë zjarri. Në automjet u gjetën gjithashtu tre fishekë pistolete.
Audi A8 digjet në bypass-in e Vlorës
Rreth orës 16:30, pranë fshatit Kaninë, në bypass-in e Vlorës, u konstatua duke u djegur një automjet tip “Audi A8”.
Policia dyshon se automjeti është përdorur nga persona të përfshirë në ngjarje.
Nga hetimet paraprake ka rezultuar gjithashtu se gjatë përplasjes në ambientet e hotelit, shtetasi Angjelo Breshani ka marrë armën e zjarrit që Bedinaj e posedonte me leje dhe ka qëlluar në drejtim të automjeteve të personave të tjerë.
Policia sqaron se nuk ka pasur të shtëna brenda ambienteve të hotelit, ndërsa përplasja me armë ka ndodhur në oborr.
Pesë të arrestuar, gjashtë persona në kërkim
Në përfundim të veprimeve të kryera, Policia ka arrestuar në flagrancë:
Luan Muça, 55 vjeç, banues në Tiranë;
Klaudio Lleshaj, 29 vjeç, banues në Tiranë;
Mandrit Lleshaj, 33 vjeç, banues në Tiranë;
Blerim Heta, 40 vjeç, shtetas kosovar;
Angjelo Breshani, 29 vjeç, banues në Vlorë.
Ndërkohë, gjashtë persona të tjerë dhe katër automjete janë shpallur në kërkim, ndërsa hetimet vijojnë për zbardhjen e plotë të rrethanave dhe rolit të secilit person në ngjarje.
Materialet procedurale do t’i referohen Prokurorisë për veprat penale “Shtrëngimi me anë të kanosjes për dhënie pasurie”, kryer në bashkëpunim, si dhe “Mbajtja pa leje dhe prodhimi i armëve, armëve shpërthyese dhe municionit”.
NJOFTIMI I PLOTE
Drejtori i Policisë Vlorë: Siç jeni bërë me dije nëpërmjet informacionit paraprak, sot, rreth orës 11:30, jemi njoftuar nga pronari i një hoteli në Radhimë, konkretisht nga shtetasi Vasil Bedinaj, se kishte nevojë për ndihmë, pasi disa persona e kishin dhunuar dhe kërcënuar me armë zjarri.
Menjëherë pas marrjes së njoftimit, janë organizuar shërbimet e Policisë dhe janë nisur në drejtim të adresës së dhënë.
Duke vlerësuar maksimalisht informacionin e marrë, u ngritën pika kontrolli në hyrje-daljet e qytetit të Vlorës dhe në Dhërmi. Gjithashtu, menjëherë u ngrit një grup i posaçëm hetimor, nën drejtimin e Prokurorisë Vlorë.
Ndërkohë, u bashkëpunua me Drejtoritë Vendore të Policisë Gjirokastër dhe Fier për ngritjen e pikave të kontrollit edhe në këto territore.
Rreth orës 12:00, në pikën e kontrollit në Rrethin e Alikokës, një automjet fuoristradë, tip “Range Rover”, me ngjyrë të zezë, nuk iu bind shërbimeve të Policisë për të ndaluar, duke vijuar rrugën në drejtim të fshatit Peshkëpi. Gjatë ndjekjes, në vendin e quajtur Ura e Peshkëpisë, ky automjet ka dalë nga rruga, duke goditur barrierat mbrojtëse të saj.
Në këtë automjet ndodheshin tre shtetas, konkretisht shtetasi Luan Muça, drejtues i automjetit, dhe dy pasagjerët, shtetasit Klaudio dhe Mandrit Lleshaj, vëllezër, punonjës të SH.P.S.F. “Swat Security”.
Si pasojë e daljes nga rruga, shtetasit Luan Muça dhe Mandrit Lleshaj janë dëmtuar dhe janë transportuar për ndihmë mjekësore në Spitalin Rajonal të Vlorës, jashtë rrezikut për jetën.
Gjatë kontrollit të automjetit, shërbimet e Policisë gjetën dhe sekuestruan, në cilësinë e provës materiale, një armë zjarri, pistoletë, së bashku me një krehër me 16 fishekë luftarakë.
Rreth orës 13:00, pika e kontrollit e ngritur nga shërbimet e DVP Fier, në vendin e quajtur Mbikalimi i Memorialit, ka ndaluar një nga automjetet e shpallura në kërkim, me drejtues shtetasin kosovar Blerim Heta.
Nga këqyrja dhe kontrolli i automjetit u konstatua se kishte dëmtime në xhamin nga krahu i pasagjerit, të shkaktuara, dyshohet, me armë zjarri. Në brendësi të automjetit u gjetën tre fishekë pistolete.
Rreth orës 16:30, në bypass-in e Vlorës, afër fshatit Kaninë, është konstatuar duke u djegur një automjet tip “Audi A8”, i dyshuar se është përdorur nga autorët në ngjarje.
Nga tërësia e veprimeve hetimore rezulton se shtetasi Luan Muça, së bashku me disa shtetas të tjerë, ka shkuar në hotelin në pronësi të shtetasit Vasil Bedinaj, të cilit, nën kërcënimin e armëve dhe dhunës fizike, i kanë vendosur një gjobë prej 5 milionë eurosh dhe e kanë kërcënuar që, pas 48 orësh, të largohej nga Shqipëria.
Ndërkohë, shtetasi Angjelo Breshani ka shkuar te automjeti i shtetasit Vasil Bedinaj dhe ka marrë armën e zjarrit që ky e posedon me leje dhe ka qëlluar në drejtim të automjeteve të personave që ndodheshin aty.
Në përfundim të veprimeve, u bë arrestimi në flagrancë i shtetasve:
– Luan Muça, 55 vjeç, banues në Tiranë;
– Klaudio Lleshaj, 29 vjeç, banues në Tiranë;
– Mandrit Lleshaj, 33 vjeç, banues në Tiranë;
– Blerim Heta, 40 vjeç, shtetas kosovar;
– Angjelo Breshani, 29 vjeç, banues në Vlorë.
Janë shpallur në kërkim 6 shtetas dhe 4 automjete të dyshuara se janë përfshirë në ngjarje dhe vijon puna intensive për kapjen e tyre.
Në bashkëpunim me Prokurorinë, vijojnë veprimet hetimore dhe operacionale për dokumentimin e plotë të kësaj ngjarjeje.
Materialet do t’i referohen Prokurorisë për veprat penale “Shtrëngimi me anë të kanosjes për dhënie pasurie”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe municionit”.
