Zhvillime të reja kanë dalë në dritë lidhur me sulmin e rëndë të ndodhur në një shkollë në Kahramanmaraş, në jug të Turqisë, ku një 14-vjeçar vrau tetë nxënës dhe një mësues, si dhe plagosi 13 persona të tjerë.
Sipas raportimeve të fundit, në rrjetet sociale po qarkullon një video që dyshohet se është regjistruar pak minuta para ngjarjes së rëndë. Në pamje, adoleshenti shihet duke lëvizur i armatosur brenda ambienteve të klasës, duke shtuar më tej tronditjen dhe reagimet në opinionin publik.
Autoritetet turke bëjnë me dije se i mituri kishte planifikuar sulmin prej disa ditësh. Hetuesit kanë zbuluar në kompjuterin e tij një dokument që sugjeron përgatitje të qëllimshme të aktit, ndërsa të gjitha pajisjet elektronike të sekuestruara nga banesa e tij po analizohen për të zbardhur plotësisht motivet.
Pas kryerjes së sulmit, 14-vjeçari i dha fund jetës së tij. Ndërkohë, hetimet janë shtrirë edhe te familja e autorit. Babai i tij, i cili ushtronte detyrën e inspektorit të policisë, është vendosur në paraburgim, ndërsa nëna është lënë e lirë.
Sipas autoriteteve, armët e përdorura në sulm rezultojnë të kenë qenë në pronësi të babait, çka ka ngritur pikëpyetje serioze mbi sigurinë dhe ruajtjen e armëve në familje.
Ngjarja e rëndë ka shkaktuar reagime të forta në Turqi, duke rikthyer në vëmendje debatet mbi sigurinë në shkolla dhe kontrollin e aksesit të të miturve në armë.
