Publicisti Lis Bukuroca ka reaguar pas deklaratës së Vjosa Osmanit, e cila tha se Lëvizja Vetëvendosje nuk ka arsye ta refuzojë rikthimin e saj në postin e presidentes.
Bukuroca e ka komentuar këtë qëndrim me një gjuhë kritike dhe ironike, duke vënë në pikëpyetje raportet politike dhe arsyet e mundshme të kundërshtimeve brenda skenës politike, transmeton “Bota sot”.
Në shkrimin e tij në Facebook, ai vlerëson se problemi nuk qëndron te emri i Osmanit, por te përplasjet dhe deklaratat e ndërsjella politike që kanë shoqëruar marrëdhëniet e saj me Vetëvendosjen dhe kryeministrin Albin Kurti. Sipas tij, këto zhvillime kanë krijuar tensione që tejkalojnë çështjen e kandidaturës, duke e zhvendosur debatin në një nivel më të gjerë politik dhe personal.
Shkrimi i plotë
Dhe sinqerisht… ka të drejtë.
Për emrin nuk ka asnjë arsye.
Madje edhe VV e do lumin Vjosa: ekologji, natyrë, pastërti.
Por kur vjen puna te mbiemri Osmani, aty ekologjia politike u turbullua dhe u ndot keq.
Jo prej VV-së, por prej deklaratave të Vjosës.
U fut krenare dhe vullnetarisht në konflikt me Kurtin, e akuzoi, e goditi, përhapi të pavërteta për të fituar 4% më shumë…
(Prisja së paku 10%)
dhe pastaj pyet:
“Pse s’më duan?”
Thuajse nuk ishe ti që ua ofrove arsyet.
Thuajse nuk ishin akuzat e tua dhe intervistat.
Shpifjet.
Ndoshta VV nuk ka asnjë arsye, por Kurti po. Madje disa!
Sidoqoftë, emrin tënd nuk do ta refuzojë askush. Shumica e do atë. Tani problemi është vetëm te ngarkesa që vjen bashkë me mbiemrin e Vjosës.
Nga një ish-presidente pritej më shumë sjellje diplomatike dhe kulturë komunikimi.
Sidomos pas shkeljes së Kushtetutës dhe prishjes së Kuvendit.
Tani mund, ndoshta mund, të të ndihmojë një pendim i sinqertë dhe një kërkimfalje.
Madje duhet.
Uroj ta bësh për Kosovën!
